«Dýbaı shokoladyn» satamyn dep jurtty aldaǵan astanalyq 3 jylǵa sottalyp ketti
ASTANA. KAZINFORM — Astana qalasynyń qylmystyq ister jónindegi aýdanaralyq soty birneshe ret alaıaqtyq jasady dep aıyptalǵan A.-ǵa qatysty úkim shyǵardy.
A. esimdi azamat Astana qalasynda «Dýbaı shokoladyn» jetkizý jáne satý týraly «Olh» saıtynda habarlandyrý jarııalap, biraq mundaı múmkindikke ıe bolmasa da WhatsApp qosymshasy arqyly óziniń banktik shotyna aqsha aýdarýdy surap, aqsha qarajaty túskennen keıin jábirlenýshilerdiń telefon nómirlerin buǵattap, 9 jábirlenýshige jalpy somasy 176 300 teńge zalal keltirgen.
Sottalýshynyń kinási onyń moıyndaýymen jáne qylmystyq is materıaldarymen dáleldengen. Oǵan QK 190-baby 3-bóliginiń 4) tarmaǵy boıynsha aıyp taǵyldy. Prokýror 3 jyl 6 aıǵa bas bostandyǵyn shekteýdi surady. Qorǵaýshy tarap pen jábirlenýshiler prokýrordyń ustanymymen kelisti.
— QK 190-baby 3-bóliginiń sanktsııasy 3 jyldan 7 jylǵa deıingi merzimge bas bostandyǵyn shekteý nemese bas bostandyǵynan aıyrý túrindegi jazany kózdeıdi. Sottalýshynyń qylmystyq jaýaptylyǵy men jazasyn jeńildetetin mán-jaılar retinde sot onyń kinásin moıyndaýyn, shyn júrekten ókinýin, qylmystyq quqyq buzýshylyq nátıjesinde keltirilgen múliktik zııandy erikti túrde óteýin jáne jas balalarynyń bolýyn tanydy. Aýyrlatatyn mán-jaılar bolmady, — delingen habarlamada.
Іs sotqa deıingi jedel tergep-tekserýmen aıaqtaldy jáne jaza taǵaıyndaý barysynda baptyń sanktsııasynda kózdelgen jazanyń jartysynan aspaýǵa tıis.
— Sot sottalýshyny bas bostandyǵynan aıyrmaýdy suraǵan jábirlenýshilerdiń ustanymyn eskere otyryp, oǵan 3 jyl 3 aı merzimge bas bostandyǵyn shekteý túrindegi jaza taǵaıyndady. Úkim zańdy kúshine engen joq, — dep atap ótti qalalyq qylmystyq ister jónindegi aýdanaralyq sot.
Qazir Dýbaı shokolady, Shaın mýskat júzimi trendtegi taǵamǵa aınaldy. Elimizge belgili adamdar ǵana emes, qarapaıym turǵyndar da ımport ónimniń qorabyn ashyp, aýzyna salǵan sátine deıin vıdeoǵa túsirip, jarııalap qoıady. Osyǵan deıin Kazinform tilshisi júzim men shokoladtyń aǵzaǵa áseri týraly anyqtap bildi.