Dýbaı polıtsııasynyń kólikteri Gınnestiń rekordtar kitabyna endi
ASTANA. QazAqparat - Dýbaıdyń quqyq qorǵaý organy qyzmetkerleri minip júrgen Bugatti Veyron kólikteri resmı túrde álem boıynsha eń jyldam júretin kólikterdiń tizimine endi. Tártip saqshylary Gınnestiń rekordtar kitaby ókilderinen arnaıy sertıfıkat aldy, dep jazady Life.ru.
Frantsııalyq avtomobıl kompanııasynyń gıperkary saǵatyna 407 km jyldamdyqpen júıtkıdi. Bul óz kezeginde Dýbaı polıtsııasynyń ıtalııalyq áriptesteriniń aldyn orap ketýge múmkindik berdi. Italııa polıtsııasynyń avtoparkinde Lamborghini Gallardo kólikteri bar. Olar saǵatyna 370 km jyldamdyqty alýǵa qaýqarly.
CNN ókilderiniń habarlaýynsha, dýbaılyq tártip saqshylary bul avtomobılderdi qylmyskerlerdi ustaý úshin paıdalanbaıdy. Bugatti Veyron týrısterdiń nazaryn aýdarý úshin solar demalatyn aımaqtardy sholyp júredi.
«Biz tek ózimizdiń kólikterimizdi kórsetip qana qoımaı, týrısterge elimizdiń polıtsııa qyzmetkerleriniń qanshalyqty qonaqjaı ekendigin tanytqymyz keledi»,-dedi BAÁ-niń eń iri qalasynyń quqyq qorǵaý organynyń ókili Sultan ál Marrı.
Onyń sózinshe, tártip saqshylarynyń janynan ótip bara jatqandar qymbat kólikke minip kórý úshin «bizdi tutqynǵa alyńyzdarshy» degen ótinishterin bildirip, qaljyńdap ta jatatyn kórinedi.
