Dýbaı ortalyǵynda kóp qabatty záýlim úı órtendi
ASTANA. 18 qarasha. QazAqparat - Birikken Arab Ámirlikteriniń eń iri qalasy Dýbaıda kók tiregen kópqabatty turǵyn úıde órt boldy.
Oqıǵa jańadan salynyp jatqan Djýmeıra Leıks Taýers aýdanynda boldy. Bul týraly Al Arabiya habarlady.
Jergilikti ýaqyt boıynsha túngi saǵat eki shamasynda aýdannyń záýlim úıleriniń biri - Tamvıl Taýer órtendi. Adamdardy qaýipsiz jerge shuǵyl túrde kóshirýdiń arqasynda zardap shekkender bolǵan joq, dep habarlady RBK.
Tamvıl Taýerdiń turǵyndarynan bólek, aspan tiregen eki kórshi turǵyn úıdiń de adamdary qaýipsiz aýmaqqa shyǵaryldy.
Emirates 24/7 habarlaýynsha, qazirgi ýaqytta tilsiz jaýdy baqylaýǵa alý múmkin boldy, degenmen, ol tolyǵymen aýyzdyqtalǵan joq.
Djýmeıra Leıks Taýers - ámirliktiń aýqymdy qurylys jobasy. Ol jasandy kóldiń jaǵalaýynda ornalasqan 80 záýlim ǵımarattan turady. Qurylys alańyna jaqyn mańda Palm Djýmeıra jasandy araly bar.
