Dýbaı men Qyzylordanyń kógaldandyrý shyǵyndaryn salystyrýǵa kelmeıdi — óńir basshysy

Dýbaı men Qyzylordanyń kógaldandyrý shyǵyndary salystyrýǵa kelmeıdi. Bul týraly «Jibek Joly» telearnasynyń «Ýáde» baǵdarlamasyna suhbat bergen Qyzylorda oblysynyń ákimi Nurlybek Nálibaev aıtty, dep habarlaıdy Kazinform.

«Qyzylorda — taza qalalardyń biri. Shań-tozań bolyp jatqan joq. Árıne kógaldandyrýda problema bar. Máselen, bizdiń jerimizdi Shymkent qalasymen ne bolmasa Jambyl oblysymen, Taraz qalasymen salystyrýǵa kelmeıdi. Jerimiz tuzdy. Tuzdy sý jer betine óte jaqyn. Kógaldandyrýǵa ketip jatqan Dýbaıdaǵy shyǵyn men Qyzylordadaǵy shyǵyndy salystyrýǵa kelmeıdi. Árıne, qarajat bolsa kógaldandyrýǵa bolady. Almaty ne Shymkent qalasynda aǵash ekseń shyǵady. Dán tússe ónedi. Bizde de shyǵady, biraq óte kóp eńbekti, shyǵyndy qajet etedi. Ákim bolmasam men de „ákimshilik durys qaramaıdy“ degendeı synı kózben qaraıtyn shyǵarmyn. Ákim bolǵannan keıin jaqsy bilemin. Qalaǵa ózimniń úıim sııaqty janym ashyp qaraımyn. Ár azamat solaı bolýy tıis dep esepteımin», — dedi Nurlybek Nálibaev.

Oblys basshysynyń aıtýynsha, óńirde 10-15 jyl ósip turǵan aǵash keıde ózinen-ózi qýrap qalady. Sondaı-aq 20-25 jyl bolǵan aǵashtar 6 metrden artyq óspeıdi. 

«Jalpy, burynǵy jyldarmen salystyrǵanda syr óńirinde Memleket basshysynyń, Úkimet basshysynyń qoldaýymen qaı jaǵynan alyp qarasaq ta úlken serpilis bar. Aýyz sý máselesi óńir boıynsha qazir 98 paıyzǵa sheshildi. Gaz 75 paıyzǵa tartyldy. Qalalar, aýdan ortalyqtary 100 paıyz gazdandyryldy. Qazir aýyldarǵa jetkizilip jatyr. Jaqsy joldardyń úlesi 78 paıyzǵa jetti. Bıýdjet aldyńǵy jyldarmen salystyrǵanda 57 paıyzǵa ósip, 609 mlrd teńgege jetti», — dedi óńir ákimi.