Dýbaı Islam ekonomıkasynyń ortalyǵyna aınalýdy kózdeıdi
ASTANA. 8 qazan. QazAqparat - Birikken Arab Ámirlikterine qarasty Dýbaı bıligi shahardy úsh jyldyń ishinde, ıaǵnı 2016 jylǵa deıin jahandyq ıslam ekonomıkasynyń ortalyǵyna aınaldyrýǵa kúsh salatynyn jetkizdi.
Muslim.kz saıtynyń jazýynsha, óz aldyna bir memleket bolyp otyrǵan qala kólik kommýnıkatsııasy men tranzıttik saýdanyń, sondaı-aq, qarjy operatsııalary boıynsha jahandyq ortalyq retinde ózin tanytyp úlgerdi. Endigi jerde, bul jetistikke toqmeıilsip qalmaı, qarqyndy túrde damyp kele jatqan ıslam ekonomıkasynyń ortalyǵyna aınaldyrýdy kózdeıdi.
Osyǵan baılanysty qabyldanǵan málimdemede aıtylǵandaı, sharıǵat talaptaryna saı taýar óndirý men qyzmet kórsetýdiń jahandyq mólsheri 8 trln. dollarǵa jetken. Álem musylmandarynyń uzyn-sany 1,6 mlrd adamdy quraıdy. Al, syrtqy saýda mólsheri 4 trln. dollarǵa baǵalanyp otyr.
«Islam ekonomıkasynyń mańyzy sońǵy jyldardaǵy eleýli tabyspen ólshenbeıdi. Aldaǵy ýaqyttaǵy ósimimen anyqtalady. Islam ekonomıkasynyń ósý qarqyny jylyna 10-15 paıyzdy quraýy múmkin», - delingen Dýbaı bıliginiń resmı málimdemesinde.
Islam ekonomıkasy damýy úshin eń aldymen tıisti zańdar qabyldanyp, arnaıy rettep otyratyn ári úılestiretin quzyrly organ qurylýy qajet.
