Dýbaı «ıslam ekonomıkasynyń» ortalyǵy bolmaqshy
ABÝ-DABI. 6 qazan. QazAqparat - Dýbaı qalasynda (BAE) emırat megapolısin «ıslam ekonomıkasynyń ortalyǵyna» aınaldyrý jónindegi bastamanyń tusaýyn kesý rásimi bolyp ótti.
Atap aıtqanda, Emırat bıligi Dýbaıdy ıslam normalaryna sáıkes qarjynyń, azyq-túlik satýdyń, bilim men týrızmniń ortalyǵy jasaý baǵytynda belsene jumys jasamaqshy.
BAE Vıtse-prezıdenti, eldiń premer-mınıstri jáne Dýbaı emıratynyń basqarýshysy sheıh Mohammed bın Rashıd Al Maktým jobanyń ashylý saltanytynda sóz sóılep, osy baǵyttaǵy keıbir qadamdar týraly aıtyp berdi.
Dýbaı basshysy osy maqsatqa jetýdegi alty bastamany atady. Olar: «Sýkýk» (oblıgatsııaǵa ıslamdyq balama), «Re-Takafýl» (saqtandyrý), Halal parkter (halal ónerkásibiniń aımaǵy), halaldy sertıfıkattaý jónindegi jeke kompanııa, ıslamdyq sandyq ekonomıka, sondaı-aq sharıat pen ıslam ekonomıkasynyń standarttary negizinde basqa da qarjy qyzmetterin damytý bolyp tabylady.
Infrastrýktýranyń damyǵandyǵy, Taıaý Shyǵystyń ortalyǵyndaǵy yńǵaıly jerde ornalasýy, saıası turaqtylyǵy men bıznesti damytýǵa ashyq jaǵdaı jasalǵandyǵy atalǵan jobany iske asyrýda Dýbaıdyń paıdasyna sheshilip turǵandyǵyn aıta ketken jón.
