Dýbaı ınvestorlarǵa bıznesti jeńildetý sharalaryn engizýge kiristi
ASTANA. KAZINFORM — Emırattyń memlekettik jáne kommertsııalyq uıymdary ınvestorlar úshin bıznesti júrgizýdi jeńildetý sharalaryn ázirleýdi bastaıdy, dep habarlaıdy Kazinform agenttiginiń menshikti tilshisi.
Dýbaıdyń ekonomıkalyq qaýipsizdik ortalyǵy, Dýbaı erkin aımaqtar keńesi jáne Emirates NBD banki ınvestorlarmen jumys sapasyn jaqsartý jáne bıznesti jeńildetý maqsatynda strategııalyq yntymaqtastyqqa baǵyttalǵan memorandýmǵa qol qoıdy.
Memorandýmǵa qol qoıǵan taraptar ınvestorlardyń banktik shottaryn ashý protsedýralaryn jedeldetý, ozyq tsıfrlyq sheshimder men jańa tehnologııalardy engizý arqyly operatsııalyq tıimdilikti arttyrý jáne normatıvtik talaptarǵa sáıkestikti jaqsartý boıynsha birlesip jumys isteıtin bolady.
Sonymen qatar, kompanııa ashylǵannan keıin ınvestorlarǵa yńǵaıly bolý úshin tirkeý, lıtsenzııalaý jáne kommertsııalyq operatsııalardy ońtaılandyrý josparlanyp otyr.
Bul maqsattar úshin taraptar qajetti aqparattar men derekterdi almastyratyn bolady.
Esterińizge sala keteıik, buǵan deıin Dýbaı qolma-qol aqshany qoldanýdy azaıta bastaǵanyn, sondaı-aq qalada júrgizýshisiz taksı qyzmeti iske qosylǵanyn jazǵanbyz.