Dýbaı bıyl qolma-qol aqshadan bas tartady
ASTANA. KAZINFORM — Dýbaı bıyl qolma-qol aqshadan bas tartyp, qolma-qol aqshasyz tólemderge ótip jatyr, dep habarlaıdy Kazinform menshikti tilshisi.
— Dýbaıdaǵy memlekettik jáne jeke sektorlardaǵy barlyq tólemniń 90%-y 2026 jyldyń sońyna qaraı qolma-qol aqshasyz bolady, — dep habarlady Dýbaı úkimetiniń baspasóz qyzmeti.
Qolma-qol aqshasyz tólemderge kóshý strategııasy alǵash ret 2024 jyly jarııalandy.
Ol banknottar men monetalardy alyp tastaýǵa jáne Dýbaıdy qolma-qol aqshasyz qalaǵa aınaldyrýdyń aýqymdy maqsatyn júzege asyrýǵa baǵyttalǵan.
Bul maqsatty júzege asyrý quraldaryna bank jáne basqa da qosymshalar, kartalar jáne bolashaqta — tsıfrlyq tólem salasynda JI negizindegi ınnovatsııalar kiredi. Ámirlik bıligi Dýbaıdyń qarjylyq ınnovatsııalardyń jahandyq ortalyǵy jáne tsıfrlyq ekonomıkadaǵy jahandyq kóshbasshy retindegi ornyn nyǵaıtýdy josparlap otyr.
Osyǵan deıin 2025 jyly Dubai Duty Free dúkenderinde 719 tonna dýbaı shokolady satylǵanyn jazǵan bolatynbyz.