Dýbaı áýejaıy mańyna dron qulap, sheteldik azamattar jaraqat aldy

ASTANA. KAZINFORM — Dýbaı halyqaralyq áýejaıynyń mańynda eki ushqyshsyz basqarylatyn apparat qulady, dep habarlaıdy Kazinform tilshisi. 

Tórt adam túrli dárejedegi jaraqat aldy. Olardyń barlyǵy sheteldikter. 

— Gananyń eki azamaty jáne Bangladeshtiń bir azamaty jeńil jaraqat aldy. Úndistannyń bir azamaty ortasha dárejedegi jaraqat aldy, — dep habarlady Dýbaı Medıakeńsesi. 

Ámirliktiń qoǵam jáne BAQ-pen baılanys jónindegi resmı organy áýe qatynasy qalypty rejımde jumys istep turǵanyn qosyp ótti. 

Osyǵan deıin Dýbaı halyqaralyq áýejaıy jumysyn toqtatqany habarlandy. 

Sondaı-aq Air Astana naýryzdyń sońyna deıin Dýbaıǵa reısterdi toqtatatynyn jazdyq.  Al FlyArystan Aqtaý — Dýbaı baǵyty boıynsha reısterdi 31 naýryzǵa deıin toqtatty. 

Eske salsaq, Taıaý Shyǵystan 9517 qazaqstandyq oralǵan edi.