Dýbaı-Almaty reısiniń ushaǵy Shymkentke shuǵyl qondy
ShYMKENT. QazAqparat - Dýbaı-Almaty baǵytyndaǵy áýe reısiniń ushaǵy naýqas kelinshekke bola Shymkentke qonýǵa májbúr boldy. Bul týraly sheteldik áýekompanııanyń resmı ókilderi málim etti, dep habarlaıdy QazAqparat tilshisi.
Áýe kompanııanyń málimetinshe, bort baǵytyn bir kúnde eki ret ózgertken.
«Almatyǵa baǵyt alǵan FlyDubai FZ735 reısi aýa raıynyń qolaısyzdyǵynan bastapqyda Tashkentke qaraı ushqan. Alaıda jolaýshylardyń biri naýqastanyp qalýyna baılanysty Shymkentke qonýǵa májbúr boldy. Alǵashqy medıtsınalyq kómek kórsetilgen soń, kelinshek Shymkent qalasynda qaldyryldy. Sodan keıin ushaq Almatyǵa qaraı ushyp shyqty. Jolaýshylardan qolaısyzdyqtar týǵyzǵanymyz úshin keshirim suraımyz», -delingen habarlamada.
Shymkentte qalǵan naýqas áıeldiń jaǵdaıyn dárigerler aıtyp berdi. Jedel járdem qyzmeti mamandarynyń sózinshe, 30 jastaǵy Dýbaı qalasynyń turǵyny epılepsııamen aýrady.
«Jedel járdem qyzmetin tańǵy 06.22-de shaqyrtqan. Dárigerler 06.30-da kelip jetti. Sebebi, stansa áýejaıǵa jaqyn ornalasqan. Naýqasty qaraý barysynda onyń talmamen aýyratyny anyqtaldy», - dedi dárigerler.
Olardyń aıtýynsha, naýqas áıel aýrýhanaǵa jatyp em qabyldaýdan bas tartqan.
