Dýaldyq oqytý júıesine elimizdiń 100 kolledji engiziledi
ASTANA. 24 qazan. QazAqparat - 2012 jyldan bastap 65 mamandyq boıynsha jańa tıptik oqytý josparlary, 650 pán boıynsha tıptik oqytý baǵdarlamalary jáne 16 mamandyq boıynsha ıntegratsııalanǵan bilim berý baǵdarlamalary qolǵa alyndy.
Bul týraly búgin Astana qalalyq Bilim basqarmasynyń bastyǵy Ásıma Bımendına «Kásiptik bilim jáne bıznes: seriktester dıalogy» taqyrybyndaǵy ІІІ qalalyq forýmda aıtty.
Onyń aıtýynsha, atalǵan tıptik oqytý baǵdarlamalary men josparlarynda bilim alý ýaqytyn tájirıbemen ushtastyrýǵa kóbirek nazar aýdarylǵan.
Sondaı-aq, bilim berý mekemeleri jumys berýshilerdiń ótinishi boıynsha jańa mamandyqtar men pánderdi óz erikterimen qosa alady.
«Qazirgi kezde qalamyzdyń 5 tehnıkalyq jáne kásiptik bilim berý mekemesinde, al jalpy alǵanda, elimizdiń 100-den astam kolledjderinde aýyl sharýashylyǵy, kólik, metallýrgııa, mashına jasaý, munaı-gaz, hımııalyq jáne ken óndirisi salalaryndaǵy kadrlardy dýaldyq bilim berý júıesimen daıyndaý elementteri engizilýde», - deıdi Á. Bımendına.
Onyń aıtýynsha, dýaldyq júıeni engizý bıyl Astanadaǵy 10-nan astam kásiporynnyń bilikti kadrlar daıyndap shyǵarýǵa qatysýyna múmkindik beredi. Al respýblıka kóleminde 120-dan astam mamandyq boıynsha jańa kadrlardyń 70 paıyzdyq óndiristik tájirıbeden óte júrip bilim alýyna jol ashylady.
Osylaısha, óndiris oryndary tehnıkalyq jáne kásiptik bilim berý mekemelerimen birige otyryp, ózderiniń talaptary boıynsha bilim alyp shyqqan daıyn kadrlardy birden jumysqa alatyn bolady.
