Dýaldy oqytý júıesi suranysqa ıe mamandyqtardyń bedelin arttyrady - sarapshy
ASTANA. QazAqparat - Qazaqstanda dýaldy oqytý júıesin engizý suranysqa ıe mamandyqtardyń bedelin arttyrady. Bul týraly Ortalyq kommýnıkatsııalar qyzmetinde ótken brıfıngte Qazaqstannyń strategııalyq zertteýler ınstıtýty Ekonomıkalyq zertteýler bóliminiń meńgerýshisi Bella Syrlybaeva málim etti.
«Dýaldy oqytý júıesinde stýdentter kolledjderde tek 20-30 paıyz ýaqytyn ótkizedi, qalǵan 70 paıyzyn óndiristiń basynda ótkizip, tájirıbe ústinde bilim alady. Eń negizgi qarjylyq shyǵyndardy ónerkásiptiń ózi moınyna alady. 2,5-3 jyldyq oqý aıaqtalǵannan soń, túlekter jumys izdeý mashaqatyn kórmeıtin bolady. Jumysqa ornalasý úlesi shamamen 90 paıyzdyń ústinde. Qaıta daıyndyqtan ótkizýge qarajat jumsap kerek emes», - dedi B.Syrlybaeva.
Onyń aıtýynsha, atalǵan júıe eldiń eńbek naryǵyn joǵary bilikti mamandarmen qamtamasyz etýge septigin tıgizbek.
«Dıplom alysymen túlek joǵary bilimdi jáne óte bilikti maman bolyp shyǵady. Osy tusta aıta ketken jón, Qazaqstanda dýaldy oqytý júıesin engizý suranysqa ıe mamandyqtardyń bedelin arttyrady. Sebebi ol mamandardyń aldynda úlken joldar ashylady», - dep atap ótti sarapshy.
