Dýaldy bilim júıesimen kolledjde oqyǵan jastardyń 68 paıyzy jumysqa turdy

NUR-SULTAN. QazAqparat – Dýaldy bilim berý júıesi arqyly kolledjde bilim alǵan túlekterdiń 68%-y jumyspen qamtyldy. Bul týraly QR BǴM Tehnıkalyq jáne kásiptik bilim berý departamenti dırektorynyń orynbasary Ernat Júnisov málim etti, dep habarlaıdy QazAqparat tilshisi.

«Búginde dýaldy bilim berý júıesimen 60 myńnan astam stýdent oqyp jatyr. Byltyr atalǵan júıemen 11 myńnan astam stýdent kolledj bitirdi. Sonyń 68 paıyzy jumyspen qamtyldy. Dýaldy júıe arqyly oqyǵan stýdentterge eńbek ótili eseptelip, kórsetildi. Sol boıynsha olar jumysqa ornalasty», - dedi Ernat Júnisov ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, atalǵan baǵyttaǵy jumys jalǵasyn tabady. Sondaı-aq, mınıstrlik ókili otandyq kolledjderdiń jabdyqtalý jaǵdaıyn sóz etti.

«Sońǵy 2 jyl ishinde «Jas maman» jobasy arqyly 180 kolledj 48 mlrd teńgege zamanǵa saı qaıta jabdyqtaldy. Bul jumysty odan ári jalǵastyryp, basqa kolledjderdi de jabdyqtaý jergilikti atqarýshy organdardyń quzyretinde. Bul másele halyqqa bilim berý ulttyq jobasyna da engizildi. Bul jumys birtindep jalǵasyn tabady», - deıdi ol.

Buǵan deıin elimiz boıynsha 18 kolledjdiń jabylǵany habarlandy.

Sondaı-aq, BǴM brıfınginde tehnıkalyq jáne kásiptik bilim berýge arnalǵan memlekettik tapsyrystyń artatyny aıtyldy.