Dýaldy oqytý: Tálimgerlerge aqy tólenedi
ASTANA. QazAqparat - Qazaqstan kolledjderindegi dýaldy oqytý aıasynda tálimgerlik úshin qosymsha aqy tólenetin bolady, dep habarlaıdy QazAqparat tilshisi.
«Ózekti taqyryptardyń biri tálimgerlerge aqy tóleý máselesi edi. Bıznes-seriktesterimiz osy máseleni aıtyp keledi, sebebi olardyń barlyǵy óndiriste stýdentterge jetekshilik etetin arnaıy mamandy taǵaıyndaı almaıdy. (...) Qazir jan basyna qarjylandyrý ádistemesi aıasynda bul joba úsh óńirge pılottyq rejımde engiziledi. Olar - Pavlodar, Almaty jáne Qaraǵandy oblystary», - dedi QR Bilim jáne ǵylym vıtse-mınıstri Ashat Aımaǵambetov Ortalyq kommýnıkatsııalar qyzmetinde ótken baspasóz máslıhatynda.
Tálimgerlerge aıyna shamamen 64 myń teńge tólenedi dep josparlanyp otyr. Odan bólek, tálimgerler balamen jumys isteý daǵdylaryn úırenetin bolady.
Vıtse-mınıstrdiń aıtýynsha, bıznes oqý baǵdarlamalaryn qalyptastyrý jáne ózgertýge qyzyǵýshylyq tanytýda jáne belsendi qatysyp jatyr. Osylaısha, túlekter naryqqa qajetti mashyqtardy úırenip shyǵady.
BǴM keltirgen málimetterge sáıkes, búginde kolledjderdiń 56%-i mamandardy dýaldy oqytý tehnologııasy boıynsha ázirleýde, bıznestegi áriptestermen 10 myńnan astam kelisimshart bekitilgen.
Dýaldy tehnologııa boıynsha bilim alyp jatqan 2 myńnan astam stýdent kásiporyndar negizinde óndiristik tájirıbeden ótip, eńbekaqy alyp júr. Eńbekaqy kólemi 16-20 myń teńgeden bastalady jáne 100 myń teńgege deıin jetedi. Tájirıbe stýdenttiń eńbek ótili retinde esepteledi.
