Dýaldi oqytý júıesin jetildirý - zaman talaby
ASTANA. QazAqparat - Ońtústiktiń mamandary bir jyldan beri nemis tehnologııasyn utymdy qoldanyp keledi, dep habarlaıdy QazAqparat.
Dýaldy oqytý jobasy aıasynda jergilikti kásipkerler Germanııanyń bızneske qajetti mamandardy daıarlaý tájirıbesimen tanysýǵa múmkindik alyp otyr. Osydan eki jyl buryn «Atameken» ulttyq kásipkerler palatasynyń jetekshileri Trır qalasynyń qolóner palatasy basshylyǵymen birlesip, dýaldy oqytý júıesi boıynsha birlesken áriptestik jobany qolǵa alǵan bolatyn.
Mundaǵy maqsat - shaǵyn jáne orta bızneske qajetti kadrlardy kásiporyndar men elimizdiń kolledjderinde daıyndaý. Qazir osynaý bastama aıasynda qurylys, týrızm, restoran bıznesine qajetti mamandar oqytylýda. Búginde kúngeı kásipkerleri nemis mamandarymen birlesip jumys isteýde. Sheteldikter oqý josparlaryn daıyndap, tipti, qoldanystaǵy júıelerge ózgerister engizýde. Bir sózben aıtqanda jergilikti kásiporyndardyń zamanaýı tehnologııalardy urshyqsha ıirip áketýine kómektesip jatyr. «Atameken» UKP men Trır qalasynyń qolóner palatasy birlesip qolǵa alǵan joba 2017 jylǵa deıin jalǵasady. Baǵdarlama balamasy Afrıka, Malaızııa jáne Amerıka elderinde qoldanysta.
Aıta ketý kerek, Qazaqstan Prezıdenti Nursultan Ábishuly Nazarbaevtyń «Qazaqstan joly-2050: Bir maqsat, bir múdde, bir bolashaq» Joldaýynda taıaýdaǵy 2-3 jylda dýaldik, tehnıkalyq jáne kásiptik bilim berýdiń ulttyq júıesin qalyptastyrý da qazirgi ýaqyt talaby ekendigi aıtylǵan. Qazaqstandyq kásiptik bilim berý júıesinde qos baǵytty bilim berýdiń ǵylymı-teorııalyq negizderi jan-jaqty zerttelýde. Sheteldik tájirıbelerge súıene otyryp, bilim berýdiń jańa býyn memlekettik standarttaryn jasaýǵa jumys berýshiler qatystyrylyp, dýaldyq júıeni kásiptik bilim berý úlgisine engizýdiń múmkindikteri men alǵysharttary qarastyrylýda.
Kásiptik bilim berýdiń memlekettik standarttarynyń jańa býyny quzyrettilik qatynasqa negizdelgen, soǵan sáıkes qazirgi zamanǵy maman eńbek naryǵynda jáne kásibı salada áleýmettik qorǵalýdy, ıkemdilikti, beıimdelgishtikti, tabystylyqty qamtamasyz etetin áleýmettik jáne kásibı sapalardyń jıyntyǵyna ıe bolýy qajet. Standart talaptaryna sáıkes, kásibı quzyretti maman daıarlaý mazmuny bilim, bilik, daǵdylardy qalyptastyrýǵa ǵana emes, óndiris qajettilikterine sáıkes damyǵan kásibı is-áreket daǵdylaryn meńgertýge baǵyttalǵan.
