Dýaldi bilim berý júıesindegi kolledjder túlekteriniń 78 paıyzy jumyspen qamtylýda
ASTANA. QazAqparat - Dýaldi bilim berý júıesin engizilgen kolledjder túlekteriniń 78 paıyzy jumyspen qamtylǵan. Bul týraly búgin Ortalyq kommýnıkatsııalar qyzmetinde tehnıkalyq jáne kásiptik bilim berý taqyrybyna arnalǵan baspasóz máslıhatynda Bilim jáne ǵylym vıtse-mınıstri Esenǵazy Imanǵalıev málim etti.
Onyń sózine qaraǵanda, 2015 jyly elimizde 348 kolledj dýaldi bilim berýmen qamtyldy. Aıta keteıik, 2014 jyly bul júıeni 280 kolledj paıdalanǵan edi. Bul baǵytta 1712 kásiporyn men 22 myńnan astam stýdent osy júıege qatysýda.
«Qazirgi kezde Zeınetaqy tóleý jónindegi memlekettik ortalyqta tirkelgen derekterdi eskere otyryp, atalǵan júıe boıynsha jumysqa ornalasý deńgeıi 78 paıyzdy qurap otyr»,-dedi vıtse-mınıstr.
2012 jyldan beri Qazaqstanda dýaldi oqytý engizilýde. Onyń negizgi ereksheligi - bilim berý teorııasy men tájirıbesi kásiporynmen birge ushtasyp jatyr. Kásiporyndar qajetti mamandyqtar boıynsha bilim berý mekemelerine tapsyrys beredi. Osy oraıda stýdentter oqýdan alystamastan, óndiristerde tájirıbeden ótý arqyly biliktilikterin shyńdaıdy.
