Du kompanııasy men Microsoft 544 mln dollarǵa aýqymdy derekterdi óńdeý ortalyǵyn iske qosady
Du kompanııasy men Microsoft 544 mıllıon dollarǵa gıpermasshtabty derekter óńdeý ortalyǵyn iske qospaq. Kelisim Dýbaıda ótip jatqan Jasandy ıntellekt aptalyǵy aıasynda jasaldy, dep habarlaıdy Kazinform agenttiginiń menshikti tilshisi.
Birikken Arab Ámirlikteriniń telekommýnıkatsııalyq kompanııasy Du seısenbi kúni Microsoft-pen gıpermasshtabty data-ortalyq salý týraly kelisim jasaǵanyn habarlady, dep jazady Reuters.
Kompanııa Du-diń málimdemesine sáıkes, data-ortalyq shamamen 2 mıllıard dırhamǵa (544,54 mıllıon AQSh dollary) salynyp, iske qosylady. Bul nysannyń negizgi jalǵa alýshysy Microsoft bolady.
Ortalyq kezeń-kezeńimen damymaq.
Gıpermasshtabty data-ortalyqtar — bul negizinen derekterdi saqtaý men bızneske arnalǵan bultty esepteý qyzmetterin úlken kólemde usynýǵa arnalǵan iri nysandar.
Kelisim 2025 jylǵy 21–25 sáýir aralyǵynda ótip jatqan Dubai AI Week jasandy ıntellekt aptalyǵy aıasynda jasaldy. Іs-sharanyń maqsaty BAÁ-niń jasandy ıntellekt salasyndaǵy kóshbasshylyǵyn kórsetý jáne tehnologııalardy ekonomıkanyń jáne qoǵamnyń negizgi salalaryna jedel engizý.
— Bul joba tsıfrlyq ınfraqurylymǵa salynǵan iri ınvestıtsııalardy bildiredi. Ol Dýbaıdyń jańa tehnologııalar, ınnovatsııalar jáne tsıfrlyq qyzmetterdi engizý salasyndaǵy kóshbasshylyǵyn nyǵaıtady, — dedi Dýbaıdyń taq murageri, premer-mınıstrdiń orynbasary jáne qorǵanys mınıstri sheıh Hamdan.
Qazirgi ýaqytta Du kompanııasy BAÁ aýmaǵynda bes derek ortalyǵyn basqarady. Bul ortalyqtar belsendi túrde damýǵa ınvestıtsııa quıyp, AQSh-tan tys jahandyq jasandy ıntellekt ortalyǵyna aınalýdy kózdep otyr.
— Bul kelisim – BAÁ-niń tsıfrlyq ekojúıesin jańǵyrtýǵa baǵyttalǵan strategııalyq maqsatymyzǵa jetý jolyndaǵy mańyzdy qadam, — dedi Du kompanııasynyń bas dırektory Fahad ál-Hassavı.
Buǵan deıin BAÁ álemde alǵash ret jasandy ıntellekt zańnamany ázirleý jáne qaıta qaraý úderisine qatysatyn júıeni iske qosatynyn málimdegen bolatyn.
Ótken aıda Qazaqstannyń Qarjy naryǵyn retteý jáne damytý agenttigi, Ulttyq bank jáne BAÁ Ortalyq banki úshjaqty yntymaqtastyq týraly memorandýmǵa qol qoıdy.