DSU: Koronavırýs – bul sońǵy pandemııa emes

JENEVA. QazAqparat – Dúnıejúzilik densaýlyq saqtaý uıymynyń basshysy Tedros Adanom Gebreıesýs pandemııanyń tsıkldik sıpatyn eske saldy. Ol búkil álemdegi densaýlyq saqtaý júıelerine ınvestıtsııalardy ulǵaıtýǵa shaqyrdy, dep habarlaıdy QazAqparat dw.com caıtyna silteme jasap.

Tedros Adanom Gebreıesýs qazirgi koronavırýs pandemııasy sońǵy pandemııa bolmaıdy dep sanaıdy. «Bolǵan oqıǵalar bizge bul sońǵy pandemııa emes ekenin jáne indetter ómirdiń bir bóligi ekenin úıretedi», - dedi Gebreıesýs senbi, 26 jeltoqsanda.

DDU basshysynyń aıtýynsha, Úkimet pen qoǵamnyń qoldaýymen júzege asyrylatyn densaýlyq saqtaý júıelerine ınvestıtsııalardyń ulǵaıýy «bizdiń jáne olardyń balalary neǵurlym senimdi ári turaqty álemdi mura etýine» jaǵdaı jasaıdy. Ótken 12 aıda koronavırýs «álemdi tóńkerip jiberdi» jáne qoǵam men ekonomıka úshin «úlken saldar» ákeldi, - dep atap ótti Tedros Adanom Gebreıesýs.

Gebreıesýs pandemııanyń múmkindigi oǵan deıin birneshe jyl buryn eskertilgenin eske saldy. «Biz bolǵan oqıǵadan sabaq alýymyz kerek», - dedi DDSU bas dırektory.

Ol elderdiń tótenshe jaǵdaılarǵa jaqsy daıyndalýy kerek ekenin jáne bul densaýlyq saqtaý salasyna ǵana emes, jalpy qoǵam men el úkimetterine de qatysty ekenin atap ótti.

Pandemııa bastalǵaly álemde 80 mıllıonnan astam adam koronavırýsqa shaldyqqan. Álem boıynsha COVID-19 saldarynan 1,76 mıllıon naýqas kóz jumǵan. 56,87 mıllıon adam saýyǵyp shyqqan.

21 jeltoqsanda Eýrokomıssııa BioNTec nemis kompanııasy men amerıkalyq Pfizer jasaǵan BNT162b2 koronavırýsqa qarsy vaktsınasyn qoldanýǵa ruqsat berdi. Vaktsına 26 jeltoqsannan bastap Germanııada da qoldanyla bastady. Alǵashqy bolyp koronavırýsqa qarsy vaktsınany qarttar úıiniń 101 jastaǵy turǵyny Edıt Kvoıtsalla (Edith Kwoizalla) aldy.