DSU qazaq kásipkerleri úshin jańa múmkindikter ashady - A. Myrzahmetov
ASTANA. 20 sáýir. QazAqparat - Dúnıejúzilik saýda uıymyna múshe bolý qazaq kásipkerleri úshin burynǵydan da jaqsy múmkindikter ashady.
QazAqparat tilshisine suhbat bergen «Atameken» odaǵy» ulttyq ekonomıkalyq palatasynyń basqarma tóraǵasy Abylaı Myrzahmetov osylaı aıtty.
«Árıne, osynaý halyqaralyq uıymǵa múshe bolý - abyroı ári úlken jaýapkershilik. Degenmen, árbir salany eskerý qajet. Sebebi bir jyldan keıin Qazaqstanǵa keletin ımport úlesi birneshe esege kóbeıedi. Onyń ústine biz kedendik salyqty uzaq ustaı almaımyz. Ony tómendetý mindetteledi. Bilýimizshe, Úkimet aýyl sharýashylyǵy salasy úshin ótpeli kezeńdi surap otyr. Ol - durys sheshim. Sebebi otandyq aýyl sharýashylyǵy ónim óndirýshilerine áli de ýaqyt qajet. Degenmen, oǵan kóp qaraılamaı-aq, básekege barynsha daıyndalǵan jón. Óıtkeni ótpeli kezeńde memleket kásipkerlerge kómek bere alady. Al sol ótkelden ótkennen keıin, esh qamqorlyq jasalmaıdy. Buǵan deıin biz Kedendik odaq aıasynda ózara básekege tússek, endi álem naryqtarymen kúsh synasyp kóremiz. Degenmen, DSU máselesinde menińshe, kóp qorqýdyń da qajeti joq, q aıta ol bastamanyń paıdaly jaǵy basym. Óıtkeni, barlyq taýar bizge ǵana kelmeıdi. Bizdiń de álemniń kóp eline tómendetilgen kedendik talaptarmen kirýge múmkindigimiz bolady. Demek, qazaq kásipkerleri úshin burynǵydan da jaqsy múmkindikter ashylady. Al ázirshe suralatyn jalǵyz máselemiz bar, ol - osy saladaǵy kelissózder jaıynda bizge de kóbirek aqparat berilip tursa», - deıdi A.Myrzahmetov.
