DSU-ǵa ótkennen keıin Qazaqstanǵa tehnologııa salasynyń joǵary suranysqa ıe mamandary kvotasyz kele alady
ASTANA. 18 qarasha. QazAqparat - DSU-ǵa ótkennen keıin Qazaqstanǵa tehnologııa salasynyń joǵary suranysqa ıe mamandary kvotasyz kele alady. Búgin Parlament Májilisindegi Úkimet saǵatynda Ekonomıkalyq ıntegratsııa isteri mınıstri Janar Aıtjanova osylaı málim etti.
Toqtala ketetin jaıt, depýtat Shalataı Myrzahmetov jıyn barysynda Qazaqstan DSU-ǵa engennen keıin sheteldik mamandar eńbek naryǵyna keńinen enip ketpeı me, degen qaýpin alǵa tartqan bolatyn. «Shyndyǵynda sheteldik jumys kúshi az emes. Tipti keıbir kompanııalardyń mańyzdy basshylyǵynda da solar otyr. Bul DSU aıasynda odan saıyn artyp, bizdiń jastarymyz jumyssyz qalmaı ma?», dedi depýtat.
Óz kezeginde mınıstr Qazaqstan zańnamasyna sáıkes, sheteldik jumys kúshine kvota qarastyrylǵanyn atap ótti. «Aǵymdaǵy jyly ekonomıkalyq belsendi halyqtyń sanynan 1.2 paıyz deńgeıinde kvota bekitilgen bolatyn, ıaǵnı, 108 myń sheteldik jumysshylar Qazaqstanǵa kvota arqyly kele alady. Alaıda, 2012 jyly olardyń 25 paıyzy elimizge kelgen joq. Al DSU ótkennen keıin biz asa joǵary tehnologııalyq salalarda qajetti mamandardy kvotasyz tartatyn bolamyz. Bul jumys tobynyń anyqtamasy boıynsha tek joǵary bilikti ári arnaıy dıplomy bar sheteldikter, ınjenerler, sosyn Qazaqstanda tapshy mamandarǵa qatysty kvotany qoldanbaıtyn bolamyz. Biz biliktiligi tómen sanattaǵy sheteldik eńbekshilerdiń elimizge kelýi týraly DSU aıasynda eshqandaı mindetteme alǵan joqpyz», dedi mınıstr. Onyń aıtýynsha, jumys kúshterine qatysty kvota ary qaraı da qoldanyla beretin bolady.
