DSU-ǵa ótkennen keıin elimizde baılanys qyzmeti tómendep, sheteldik bankter fılıaldary kóptep ashyla bastaıdy
ASTANA. 18 qarasha. QazAqparat - DSU-ǵa ótkennen keıin elimizde baılanys qyzmeti tómendep, sheteldik bankter fılıaldary kóptep ashyla bastaıdy. Bul týraly búgin Parlament Májilisindegi Úkimet saǵatynda Ekonomıkalyq ıntegratsııa isteri mınıstri Janar Aıtjanova málim etti.
«Qazaqstannyń DSU-ǵa ótkennen keıingi 2,5 jyldan soń, ıaǵnı ótpeli kezeńnen keıin qalaaralyq jáne halyqaralyq baılanys qyzmetin kórsetetin telekommýnıkatsııalyq kompanııalardaǵy shetel kapıtaly úlesiniń 49 paıyz mólsherindegi shekteýi qoldanylmaıtyn bolady. Osylaısha, bul salalarda sheteldik telekommýnıkatsııalyq kompanııalar tarapynan salynatyn ınvestıtsııalarǵa jol ashylady. Sonymen birge, «Qazaqtelekom» kompanııasyndaǵy shetel kapıtalynyń mólsheri 49 paıyzdan aspaýy týraly shekteý DSU kirgennen keıin de ary qaraı memleket tarapynan qoldanyla beretin bolady», - deıdi mınıstr J. Aıtjanova.
Mınıstrdiń aıtýynsha, Qazaqstan DSU ótkennen keıingi bes jyldan keıin shetel bankteri men saqtandyrý kompanııalary bizdiń elimizde ózderiniń tikeleı fılıaldaryn ashýǵa múmkindik alady. «Óz kezeginde Qazaqstan qarjy naryǵyndaǵy turaqtylyqty qamtamasyz etý maqsatynda shetel qarjy kompanııalaryna arnaıy mindetti talaptardy qoıa alady. Máselen, shetel bankteri men saqtandyrý kompanııalaryna eń tómen aktıvteriniń mólsherin jáne turǵyndardan tartylatyn depozıtterdiń eń tómen mólsherin memleket ózi bekitedi», - deıdi mınıstr.
Onyń aıtýynsha, joǵarydaǵy sharalar telekommýnıkatsııalyq jáne qarjy salalaryndaǵy lıberızatsııalaý josparynyń nátıjesinde qyzmetterdiń sapasynyń artýyna, salalarǵa shetelderden keletin ınvestıtsııalarǵa jol ashýǵa jáne tutynýshylar úshin qoldanylyp otyrǵan baǵalardyń tómendeýine múmkindik beredi.
