DSU-ǵa qosylý boıynsha Ulybrıtanııa men Ózbekstan arasyndaǵy kelissóz aıaqtaldy

TAShKENT. KAZINFORM – Ózbekstannyń Dúnıejúzilik saýda uıymyna (DSU) qosylýy boıynsha resmı Tashkent pen London arasynda júrgizilgen ekijaqty kelissóz aıaqtady, dep habarlaıdy Kazinform agenttiginiń menshikti tilshisi.

Bul týraly DSU máseleleri jónindegi Ózbekstan prezıdentiniń arnaıy ókili Azızbek Ýrýnov málim etti.

- Ótken aıdyń sońynda biz Londonda Ulybrıtanııa tarapymen kezdesý ótkizdik. Bul kelissózder sátti aıaqtaldy. Endi bıyl 12 maýsymda Jenevada ótetin jumys tobynyń 10-shy otyrysy aıasynda tıisti hattamaǵa qol qoıýdy josparlap otyrmyz, - dep habarlady Azızbek Ýrýnov.

Osy kezge deıin ózbek tarapy DSU-ǵa qosylý boıynsha 30-dan asa elmen kelissóz júrgizip, sáıkesinshe 24 memleketpen tıisti kelisim jasady.

- Endi DSU-ǵa múshe birneshe elmen ekijaqty kelissózderdi aıaqtaý isi qalyp otyr, - dep málim etti Azızbek Ýrýnov.

Buǵan deıin habarlaǵanymyzdaı, Ózbekstan DSU-ǵa qosylý kelissózderin bıyl aıaqtaýǵa nıetti.

DSU-ǵa qosylý boıynsha ózbek tarapy byltyr AQSh jáne Qytaımen arada ótken kelissózderdi qorytyndylady.