DSU-ǵa qosylý boıynsha Qytaı men Ózbekstan arasyndaǵy kelissózge Astanada núkte qoıyldy

TAShKENT. KAZINFORM – Birer saǵat buryn Ózbekstan Prezıdenti Shavkat Mırzıeev pen Qytaı Tóraǵasy Sı Tszınpın Astanada kelissóz júrgizdi, dep habarlaıdy Kazinform agenttiginiń menshikti tilshisi.

Kezdesýde taraptar keıingi jyldary ózbek-qytaı qarym-qatynasynyń nyǵaıyp kele jatqanyn atap ótti. Máselen, byltyr Shavkat Mırzıeevtiń Beıjińge jasaǵan memlekettik sapary barysynda kelisilgen jobalar ýaqyly iske asyp jatyr.

Sonymen qatar saýda-ekonomıkalyq jáne ınvestıtsııalyq yqpaldastyq júıeli jolǵa qoıyldy. 2024 jyly resmı Tashkent pen Beıjiń arasyndaǵy taýar aınalymy 14 mlrd dollarǵa jetip, ınvestıtsııalyq jobalar portfeli 60 mlrd dollarǵa teńeldi.

Kelissóz barysynda Shavkat Mırzıeev pen Sı Tszınpın «Qytaı – Qyrǵyzstan – Ózbekstan» temirjol jelisiniń qurylysyn jedeldetýge ýaǵdalasty. Atalǵan joba taraptar úshin strategııalyq mańyzǵa ıe.

Kezdesý sońynda Ózbekstan men Qytaı basshylarynyń qatysýymen resmı Tashkenttiń Dúnıejúzilik saýda uıymyna qosylýy boıynsha júrgizilgen ekijaqty kelissózdi aıaqtaý hattamasyna qol qoıyldy.

Eske salaıyq, búgin elordada «Ortalyq Azııa – Qytaı» sammıti ótedi. Aýqymdy is-sharaǵa óńir memleketteriniń basshylary men QHR Tóraǵasy Sı Tszınpın qatysady. Taraptar saıası, saýda-ekonomıkalyq jáne mádenı-gýmanıtarlyq salalardaǵy yntymaqtastyqty nyǵaıtý múmkindigin talqylaıdy. Sonymen qatar prezıdentter óńirlik jáne halyqaralyq deńgeıdegi ózekti máseleler boıynsha pikir almasady.

Buǵan deıin habarlaǵanymyzdaı, Ózbekstan DSU-ǵa qosylý kelissózderin bıyl aıaqtaýǵa nıetti.