DSU-ǵa qosylý boıynsha Eýroodaq pen Ózbekstan arasyndaǵy kelissóz aıaqtaldy

TAShKENT. KAZINFORM – Dúnıejúzilik saýda uıymyna (DSU) qosylý boıynsha Ózbekstan men Eýropa odaǵy arasynda júrgizilgen ekijaqty kelissóz aıaqtady, dep habarlaıdy Kazinform agenttiginiń menshikti tilshisi.

Bul týraly DSU máseleleri jónindegi Ózbekstan prezıdentiniń arnaıy ókili Azızbek Ýrýnov málim etti. Onyń aıtýy boıynsha kelissózder eki jyl boıy júrgizilgen.

- Eýropa odaǵyna múshe 27 memlekettiń narǵyna shyǵýǵa, tıisinshe onyń aıasynda jeńildik alýǵa baǵyttalǵan kelissózder sátti aıaqtaldy, - dep habarlady Azızbek Ýrýnov.

Onyń málimdeýinshe, Eýropa odaǵy Ózbekstannyń DSU-ǵa qosylýy boıynsha kelissózdi aıaqtaǵan 31-shi tarap sanalady.

- Bir apta buryn biz Panamamen de tıisti kelisimge qol qoıdyq. Osylaısha, búgingi tańda 31 elmen júrgizilgen kelissóz óz máresine jetti. Endi 3 memleket qaldy, - dedi Azızbek Ýrýnov.

Buǵan deıin habarlaǵanymyzdaı, Ózbekstan DSU-ǵa qosylý kelissózderin bıyl aıaqtaýǵa nıetti.

DSU-ǵa qosylý boıynsha ózbek tarapy byltyr AQSh jáne Qytaımen arada ótken kelissózderdi qorytyndylady.