DSU-ǵa kirgennen keıin Qazaqstanda sheteldik bankterdiń tikeleı fılıaldary jumys isteı bastaıdy
ASTANA. 15 qarasha. QazAqparat - Qazaqstan DSU-ǵa ótkennen keıingi bes jyldan soń shetel bankteri men saqtandyrý kompanııalarynyń tikeleı fılıaldary elimizde ashyla bastaıdy. Bul týraly búgin Senatta «Otandyq óndirýshilerdiń múddelerin zańnamalyq turǵydan qamtamasyz etý jáne qorǵaý, sondaı-aq eýrazııalyq ıntegratsııa jaǵdaılarynda jáne Dúnıejúzilik saýda uıymyna kirýde olardy memlekettik qoldaý» atty taqyryptaǵy parlamenttik tyńdaýda QR Ekonomıkalyq ıntegratsııa isteri mınıstri Janar Aıtjanova málim etti.
Mınıstrdiń sózine qaraǵanda, DSU-nyń 15 memleketimen sheteldik kompanııalarǵa qatysty Qazaqstannyń qyzmet kórsetý naryǵynda memleket tarapynan qoldanylatyn sharalar týraly ekijaqty kelissózder aıaqtalǵan. Atalmysh kelissózder Qazaqstan ekonomıkasy úshin asa mańyzdy ári negizgi 12 salada júzege asqan. «Jalpy, Qazaqstan DSU-ǵa ótkennen soń bes jyldan keıin shetel bankteri men saqtandyrý kompanııalarynyń tikeleı fılıaldaryn bizdiń elimizde ashýǵa múmkindik týady. Óz kezeginde Qazaqstan qarjy naryǵynda turaqtylyqty qamtamasyz etý maqsatymen shetel qarjy kompanııalary úshin arnaıy mindetti talaptar memleket tarapynan qoldanylatyn bolady. Mysaly, shetel bankteri men saqtandyrý kompanııalarynyń eń tómen aktıvteri mólsherin jáne turǵyndardan tartylatyn depozıtterdiń tómen mólsherin Úkimet ózi bekite alatyn bolady», - dedi mınıstr J. Aıtjanova.
