DSU-ǵa engende tıimdi sharttarǵa qol jetkizbesek, Ýkraınanyń kebin kııýimiz múmkin - A. Kúrishbaev
ASTANA. 17 mamyr. QazAqparat - DSU-ǵa engende ózimiz úshin tıimdi sharttarǵa qol jetkizýge tıispiz. Áıtpese Qazaqstanda dál Ýkraınadaǵy jaǵdaı qaıtalanýy múmkin.
Búgin Astanada «Jahandaný jaǵdaıynda Qazaqstannyń agroónerkásip keshenin ekonomıkalyq damytýdyń ózekti máseleleri» atty taqyryptaǵy konferentsııa barysynda S. Seıfýllın atyndaǵy Qazaq agrotehnıkalyq ýnıversıtetiniń rektory Aqylbek Kúrishbaev osylaı málim etti.
«Aýyl sharýashylyǵy ónimderiniń básekege qabilettiligi týraly áńgime bolǵanda qaperde ustalatyn basty másele: barlyq damyǵan elderde aýyl sharýashylyǵynyń básekege qabilettiligi memlekettik qoldaýdyń esebinen qamtamasyz etiledi. ıAǵnı, bıýdjettik sýbsıdııalaý úlken ról atqarady. Eshbir jerde naryq ta, bıznes te ózdiginen bul salaǵa tártip ornata alǵan emes», - dedi alqaly jıyndy ashyp sóz sóılegen rektor A.Kúrishbaev. Onyń aıtýyna qaraǵanda, qazaqstandyq agroónerkásip kesheniniń problemalary negizinen memlekettik qoldaýdyń tym tómendiginde bolyp otyr. Tipti basqasyn aıtpaǵanda Keden odaǵynyń qatysýshylary arasynda qazaqstandyq qoldaý tómengi deńgeıde. Máselen, Belarýs Respýblıkasynda salaǵa baǵyttalatyn memlekettik qoldaý deńgeıi 17 paıyzdy qurasa, Qazaqstannyń deńgeıi 5 paıyzdan aspaıdy. Sonymen qatar, Qazaqstanda aýyl sharýashylyǵy ónimin óndirýge ketetin shyǵyn mólsheri Eýropa elderine qaraǵanda 3 esege artyq. Bul negizinen tabıǵı jaǵdaılarǵa da baılanysty bolyp keledi. Máselen, eger Qazaqstanda vegetatsııalyq maýsymda jaýyn-shashyn mólsheri 250 mıllımetrdi qurasa, Eýropada bul kórsetkish 1000 mıllımetrge deıin jetedi.
«Osyndaı jaǵdaılardy eskere otyryp, DSU-ǵa ený jónindegi kelissózder barysynda barlyq qaǵıdatty ustanymdar boıynsha otandyq aýyl sharýashylyǵy taýarlaryn óndirýshiler men óńdeýshiler úshin tıimdi sharttardy qalyptastyrýǵa qol jetkizýge tıispiz. Áıtpese Qazaqstanda Ýkraınadaǵy sekildi jaǵdaı qaıtalanýy múmkin. DSU-ǵa engennen soń Ýkraınada jumyssyzdar sany kúrt ósip, qant eksporty quldyrady, ol eldiń basqa elderge jiberetin et eksportyna qaraǵanda onyń ımporttyq bajy 8 esege tómendep ketti», - deıdi A. Kúrishbaev.
Eske sala keteıik, halyqaralyq ǵylymı-tájirıbelik konferentsııa S. Seıfýllın atyndaǵy Qazaq agrarlyq tehnıkalyq ýnıversıtetiniń 50 jyldyq mereıtoıyna arnalyp otyr.
