DSU aıasynda Qazaqstan úshin jańa múmkindikter ashylady
ASTANA. KAZINFORM – Búgin Quryltaıdyń jalpy otyrysynda «1994 jylǵy DSU-ny qurý týraly Marrakesh kelisimine Qazaqstannyń qosylýy týraly hattamaǵa qosymsha sanalatyn Kórsetiletin qyzmetter boıynsha Qazaqstannyń erekshe mindettemeleriniń tizbesine ózgeristerdi ratıfıkatsııalaý týraly» zań jobasy birinshi oqylymda maquldandy.
- Uıymǵa qosylǵan sátten bastap elimizdiń saýda kólemi 2015 jylǵy 76,5 mlrd AQSh dollarynan 2025 jylǵy 136,9 mlrd AQSh dollaryna deıin eki ese artty. Sondaı-aq, halyqaralyq uıymdar Qazaqstannyń saýda rásimderin jeńildetý jáne saýda protsesterin tsıfrlandyrý baǵytyndaǵy progresin erekshe atap ótýde. Usynylyp otyrǵan zań jobasy osy jumystyń jáne DSU-da qabyldanǵan mindettemelerdi oryndaýdyń jalǵasy sanalady. Ózgerister Qazaqstannyń qyzmetter saýdasy boıynsha Jalpy kelisimdi damytý maqsatynda kórsetiletin qyzmetterdi ishki retteý jónindegi DSU erejelerine qosylýyn qarastyrady. 2025 jyly qyzmetter saýdasy álemdik saýdanyń shamamen 28 paıyzyn qurady, al onyń ósý qarqyny taýarlar saýdasynyń ósý qarqynynan asyp tústi. Kórsetiletin qyzmetter saýdasy 5,3 paıyzǵa, al taýarlar saýdasy 4,6 paıyzǵa ósti. Bul endi tek kólik, qarjy, saqtandyrý nemese týrızm sııaqty dástúrli qyzmettermen shektelmeıdi, IT qyzmetter, elektrondy kommertsııa, bilim berý qyzmetteri belsendi damyp keledi, - dedi QR Saýda jáne ıntegratsııa mınıstri Arman Shaqqalıev.
Onyń aıtýynsha, Qazaqstanda da bul baǵytta oń ózgerister bar. Máselen, 2025 jyly qyzmetter eksporty shamamen 13 mlrd AQSh dollaryn qurady. Elektrondy saýda kólemi sońǵy bes jyl ishinde 8 ese artyp, 3,8 trln teńgege jetti.
- Búgin talqylanyp otyrǵan talaptar qyzmet kórsetý salasyn, sonyń ishinde qarjylyq qyzmetterdi retteýdiń jalpy negizderin belgileıdi. Qaǵıdalarda ótinimderdi berý rásimderi men olardy qaraý merzimderin jeńildetý, ótinimderdi jáne ruqsat qujattaryn elektrondy túrde berý múmkindikteri boıynsha usynymdar qamtylǵan. Aqparattyń ashyqtyǵy men qoljetimdiligine, sondaı-aq qabyldanatyn sharalardy ázirleý kezeńinde talqylaý múmkindigine erekshe nazar aýdaryldy. Osylaısha, negizgi mindet – qyzmet kórsetýshilerge qoıylatyn talaptardy ashyq, obektıvti jáne boljamdy etý. Bul rette, Qaǵıdalar memlekettiń qyzmet kórsetý salasyn retteý quqyǵyn shektemeıtinin atap ótken jón. Qazaqstan lıtsenzııalaýdy, biliktilik talaptaryn jáne basqa qajetti retteý sharalaryn belgileý quqyǵyn ózinde saqtaıdy. Mundaı sharalar densaýlyq, qaýipsizdik jáne basqa da qoǵamdyq múddelerdi qorǵaý maqsatynda belgilenýi múmkin. Sondaı-aq, Qaǵıdalarǵa qosylý qazaqstandyq qyzmet kórsetýshiler úshin syrtqy naryqtarda qosymsha múmkindikter jasaıtyndyǵy mańyzdy. Bul kórsetiletin qyzmettermen ózara saýda jasaý úshin teń jaǵdaılar jasalýyna yqpal etedi, - dedi mınıstr.
Osy oraıda ol tsıfrlyq ekonomıkanyń, elektrondy kommertsııanyń, qarjylyq, kólik, IT jáne kásibı qyzmetterdiń damýy Qazaqstan úshin jańa múmkindikter ashatynyn aıtty.
Qyzmet kórsetý salasyn retteýdiń ashyqtyǵy men boljamdylyǵyn arttyrý básekelestiktiń damýyna, ınvestıtsııalardyń tartylýyna jáne kórsetiletin qyzmetter eksportynyń ósýine yqpal etedi. Osy Qaǵıdalardy ratıfıkatsııalaý teris áleýmettik-ekonomıkalyq jáne quqyqtyq saldarǵa ákelmeıdi jáne respýblıkalyq bıýdjetten qosymsha qarjylyq shyǵyndardy talap etpeıdi.
Buǵan deıin Qazaqstan DSU aldyndaǵy saýda rásimderin jeńildetý mindettemelerin tolyq oryndaǵanyn jazǵan edik.
