DSM janyndaǵy patsıentterdiń quqyqtaryn qorǵaý jónindegi Qoǵamdyq keńestiń kezekti otyrysy ótti
ASTANA. 16 mamyr. QazAqparat - Búgin Astana qalasyndaǵy Ulttyq ǵylymı medıtsınalyq ortalyǵynda QR Densaýlyq saqtaý vıtse-mınıstri E.Baıjúnisovtiń tóraǵalyǵymen Densaýlyq saqtaý mınıstrligi janyndaǵy patsıentterdiń quqyqtaryn qorǵaý jónindegi Qoǵamdyq keńestiń kezekti otyrysy ótkizildi.
Bul týraly Densaýlyq saqtaý mınıstrliginiń baspasóz qyzmeti habarlady.
Keńes otyrysyna QR Parlament depýtattary, respýblıkalyq densaýlyq saqtaý, halyqaralyq jáne úkimettik emes uıymdardyń basshylary, transplantologııa salasynyń, esirtkige táýeldi adamdardy emdeýshi jetekshi mamandar qatysty.
Jıynda qoǵamda qyzý talqylanyp júrgen transplantologııanyń problemalary qaralyp, respýblıkada tinderdi jáne aǵzalardy trasplanttaý boıynsha baǵyttar anyqtalyp, esirtkige táýeldi adamdardyń apıyndyq orynbasýshy terapııa arqyly emdelýin ary qaraı júzege asyrý jónindegi máseleler talqylandy. Tinder men aǵzalardy trasplanttaý jáne basqa operatsııalardy jasaý, esirtkige táýeldi adamdardy apıyndyq orynbasýshy terapııa arqyly emdeý kezindegi quqyqtaryn qorǵaý máseleleriniń etıkalyq jaqtary qaraldy.
Jalpy elimizde 2010 jyly týystyq donorlardan búırekti transplanttaý boıynsha 9 operatsııa jasaldy. Halyqtyń mentalıtetine baılanysty donorlyq aǵzalardyń jetispeýshiligi medıtsınalyq qyzmettiń osy túriniń damýy jolynda negizgi problema bolyp otyr. Odan basqa, 2010 jyldyń qarasha aıynda «Respýblıkalyq jedel medıtsınalyq járdem ǵylymı ortalyǵynda» elimizde alǵash ret gemablastozy bar patsıentke gemopoetıkalyq diń jasýshalaryn aýtologııalyq transplanttaý boıynsha operatsııa jasaldy. Kóp naýqastar úshin bul - ómirlerin saqtap qalýdyń múmkindikteriniń biri.
Respýblıkada esirtkige táýeldi AITV - ınfektsııasyna shaldyqqan, apıyndyq orynbasýshy terapııa arqyly emdelýshilerge qatysty ilki joba 2008 jyldan bastap Qazaqstan Respýblıkasynda JITS indetine qarsy 2006-2010 jyldarǵa arnalǵan Baǵdarlama josparynyń is-sharalaryna sáıkes Pavlodar jáne Temirtaý qalalarynda júzege asyrylyp keledi. Aǵymdaǵy jyldyń mamyr aıynan bastap atalmysh jobaǵa Óskemen qalasy qosyldy. Atalǵan joba qosymsha zertteýdi jáne ilki joba aıasynda jalǵastyrýdy qajet etetindigi atap kórsetildi.
