DSM: Vırýstardyń órshýi jeltoqsannyń ortasyna deıin jalǵasýy múmkin

ASTANA. KAZINFORM — Densaýlyq saqtaý mınıstri Aqmaral Álnazarova Úkimet otyrysynda eldegi epıdemıologııalyq ahýaldy baıandady.

— Jyl saıyn respýblıkada JRVI-diń 3,5 mln jaǵdaıy jáne tumaýdyń 2 myńǵa deıingi jaǵdaıy tirkeledi. Aǵymdaǵy epıdemıologııalyq maýsym basynan JRVI-diń 1 461 myń jaǵdaıy tirkeldi, 2024 jyldyń ótken kezeńimen salystyrǵanda aýrýshańdyq 20%-ǵa tómendegeni baıqalady. Basym bóligi — 66 paıyzdan astamy 14 jasqa deıingi balalar arasynda tirkelip jatyr. Sońǵy aptada respýblıkada vırýstyq ınfektsııalardyń 183 myń jaǵdaıy tirkelip, ótken epıdemıologııalyq maýsymnyń osyndaı aptasymen salystyrǵanda aýrýshańdyq 16 paıyz artyp otyr, — dedi ol.

Mınıstrdiń sózinshe, bıyl atalǵan vırýstardyń taralýy jyldaǵydan erte baıqalyp otyr.

— Epıdmaýsym bastalǵaly beri tumaýdyń A tıpiniń (H3N2 - Qazaqstanda 2001 jyldan beri Gonkong tumaýy dep atalady), zerthanalyq rastalǵan 587 jaǵdaıy, onyń ishinde A (H1N1) tıpiniń 3 jaǵdaıy tirkeldi. Aldyńǵy jyldary tumaý tsırkýlıatsııasy 43-shi, 51-shi aptalarda, jańa jylǵa taman ósý baıqalsa, bıyl erte anyqtalyp, 41 aptada bastaldy, ıaǵnı qazan aıynyń birinshi jartysyna sáıkes kelip otyr. Boljam boıynsha ósim jeltoqsan aıynyń ortasyna deıin saqtalýy múmkin, — dedi Aqmaral Álnazarova.

Osyǵan deıin Densaýlyq saqtaý mınıstrliginiń resmı ókili Ásel Qydyrálıeva elimizde jańa tumaý shtamy tarap jatqan joq, epıdemıologııalyq jaǵdaı turaqty ekenin habarlaǵan edi.