DSM tekserisinen keıin 250-ge jýyq emdeý kabıneti jabyldy
ASTANA. KAZINFORM — Atalǵan kabınetterde medıtsınalyq qyzmetti lıtsenzııasyz júrgizý, sanıtarııalyq erejelerdi jáne dárilik zattardy durys saqtamaý tárizdi buzýshylyqtar anyqtalǵan, dep habarlaıdy Densaýlyq saqtaý mınıstrliginiń baspasóz qyzmeti.
Densaýlyq saqtaý mınıstrligi zańsyz medıtsınalyq qyzmet faktilerin jáne medıtsınalyq kómek kórsetý kezinde standarttardyń buzylýyn anyqtaý úshin respýblıka boıynsha jeke emshara kabınetterin tekserýdi jalǵastyryp jatyr. Aralaý barysynda monıtorıngtik toptar túrlik buzýshylyqqa jol bergen nemese lıtsenzııalarǵa qajetti qosymshalarsyz 406 nysandy anyqtady.
— Túsindirý jumystary júrgizilgennen keıin 247 emshara kabıneti óz erkimen qyzmetin toqtatty. Sanıtarııalyq talaptarǵa saı, emshara kabınetteri epıdemıologııalyq turǵydan óte mańyzdy nysandardyń qataryna jatady. Sondyqtan olar densaýlyq saqtaý uıymdaryna qoıylatyn barlyq talaptardy tolyq oryndaýy tıis. Sonymen birge, zańnama orta medıtsına qyzmetkerleriniń (meıirbıkelerdiń) qandaı qyzmet kórsete alatynyn naqty belgileıdi. Bul erejeler olarǵa ınvazıvti (denege ený arqyly jasalatyn) protsedýralardy oryndaýǵa ruqsat bermeıdi. ıAǵnı mundaı qyzmetterdi tıisti lıtsenzııasyz kórsetýge bolmaıdy. Qalǵan nysandarǵa tekserýler jalǵasa beredi, — delingen habarlamada.
Búgingi tańda 84 emshara kabınetine qatysty jospardan tys tekserýler aıaqtaldy. Tekserý barysynda mynadaı buzýshylyqtar anyqtaldy:
● medıtsınalyq qyzmetti lıtsenzııasyz júrgizý;
● sanıtarııalyq erejelerdi saqtamaý;
● dárilik zattardy durys saqtamaý;
● bilikti medıtsınalyq personaldyń bolmaýy;
● shuǵyl kómek kórsetý úshin jıyntyqtyń bolmaýy.
Jumys qorytyndysy boıynsha 15 mln teńgeden astam somaǵa 122 ákimshilik hattama jasaldy. Densaýlyq saqtaý mınıstrligi patsıentterdiń qaýipsizdigin qamtamasyz etý jáne densaýlyq saqtaý nysandarynda sanıtarııalyq-epıdemıologııalyq talaptardy saqtaý maqsatynda monıtorıng pen baqylaýdy jalǵastyrady.
Budan buryn Mańǵystaýda jekemenshik emshara kabınetterinde eki adam kóz jumǵany anyqtaldy.