DSM tegin dári-dármek jetkizilmegen jaǵdaıda shaǵym túsirýge shaqyrdy
ASTANA. QazAqparat - Densaýlyq saqtaý mınıstrligi turǵyndardy tegin dári-dármekpen qamtamasyz etý máselesinde kidirister bolǵan jaǵdaıda shaǵym túsirýge shaqyrdy, dep habarlaıdy «QazAqparat» HAA QR DSM baspasóz qyzmetine silteme jasap.
«QR Densaýlyq saqtaý mınıstrligi Eljan Birtanovqa tegin medıtsınalyq kómektiń kepildendirilgen kólemi aıasynda jetkizilmegen dári-dármekterge qatysty kóptegen ótinishter kelýine baılanysty osyndaı faktilerdi aıqyndaý maqsatynda DSM eldiń barlyq óńirinde turǵyndardy dári-dármekpen qamtýdy taldaý jáne monıtorıng júrgizýdi bastady», - delingen habarlamada.
Densaýlyq saqtaý mınıstrligi dıspanserlik esepte turatyn, biraq 2017 jyldyń qazanynan jeltoqsanyna deıin mınıstrliktiń №786 buıryǵymen bekitilgen tizimge sáıkes tegin dári-dármek almaǵandardyń barlyǵynan aty-jónin, JSN, baılanys telefonyn, qalasy men emhana nómirin kórsete otyryp, kf_mz@mail.ru mekenjaıyna habarlasýdy suraıdy.
Eske sala ketelik, jýyrda Astana densaýlyq saqtaý basqarmasy «Gıppokrat» dárihanalar jelisi qyzmetinen bas tartyp, tegin dári-dármekti memlekettik emhanalar arqyly berýge sheshim qabyldaǵanyn habarlaǵan bolatynbyz.
