DSM Rýdnyı qalalyq aýrýhanasyna jospardan tys tekserý júrgizbek
ASTANA. KAZINFORM — Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti bloger Tatıana Týrlaı jarııalaǵan faktilerge baılanysty «Rýdnyı qalalyq kópbeıindi aýrýhanasy» KMK-ǵa qatysty jospardan tys tekserý bastalǵanyn habarlaıdy.
Bloger Rýdnyı qalalyq aýrýhanasynyń terapııalyq bólimindegi jaǵdaıǵa nazar aýdarýdy suraǵan edi. Sózinshe, anasy sol jerde úsh aptadan beri em qabyldap jatyr.
— Sol ýaqyt ishinde men kún saıyn aýrýhanaǵa baryp, medıtsınalyq personal men naýqastarmen sóılesip, alańdatarlyq kórinisti baıqadym: bólimde qarapaıym medıtsınalyq quraldar men dári-dármekter jetispeıdi — fızıkalyq ertindi, bınt, tamshylatqysh júıeler, dári-dármekter joq. Keıbir medbıkeler qajetti quraldardy úıden ákeledi, al naýqastar keı dárilerdi ózderi satyp alýǵa májbúr. Mundaı jaǵdaı bazalyq statsıonarlyq kómek kórsetetin bólimde bolyp jatqany erekshe alańdatady… Men Rýdnyı qalalyq aýrýhanasynyń qamtamasyz etilýin tekserip, naýqastarǵa qajetti deńgeıde medıtsınalyq kómek kórsetý úshin shara qabyldaýdy suraımyn, — dep jazdy ol áleýmettik jelidegi paraqshasynda.
Komıtet medıtsınalyq uıymnyń qyzmetine aýdıt júrgizip, dárilik preparattarmen jáne medıtsınalyq buıymdarmen úzdiksiz qamtamasyz etý máselesin tekseredi.
— Atalǵan jaǵdaı vedomstvo basshylyǵynyń jeke baqylaýynda. Qostanaı oblysy densaýlyq saqtaý basqarmasynyń aqparaty boıynsha qazirgi ýaqytta aýrýhananyń bólimsheleri medıtsınalyq kómek kórsetý úshin jetkilikti kólemde qajetti dárilik zattarmen jáne medıtsınalyq buıymdarmen qamtamasyz etilgen. Tekserý qorytyndysy boıynsha halyqqa sapaly ári ýaqtyly medıtsınalyq kómek kórsetýdi qamtamasyz etý maqsatynda komıtet tıisti sharalar qabyldaıtyn bolady, — delingen komıtet taratqan aqparatta.
Osydan buryn Qazaqstanda orfandyq (sırek kezdesetin) aýrýy bar naýqastardyń em alý múmkindigi qıyndap bara jatqanyn jazǵanbyz. Bir ǵana júıke-bulshyqet dıagnozdary boıynsha tirkelgen patsıentterdiń sany shamamen 700 adam.