DSM perzenthanalarda kórsetiletin qyzmetterdiń tarıfterin qaıta qarady
ASTANA. KAZINFORM – QR Densaýlyq saqtaý mınıstrligi perzenthanalarda medıtsınalyq kómektiń sapasyn jaqsartý maqsatynda bosandyrý jáne neonatologııa salasynda kórsetiletin qyzmetterdiń tarıfterin qaıta qarady.
QR Densaýlyq saqtaý mınıstrligi baspasóz qyzmetiniń habarlaýynsha, 1 maýsymnan bastap kesar tiligin qosa alǵanda, kúrdeli bosanýǵa arnalǵan tarıfter 60%-ǵa, al jańa týǵan nárestelerge kútim jasaý - 35%-ǵa ulǵaıdy. Bul medıtsınalyq qyzmetterdiń tizbesi men sapasyn keńeıtýge jáne bilikti mamandardy tartýǵa múmkindik beredi.
Sońǵy jyldary tarıfter medıtsınalyq uıymdardyń bosanatyn áıelder men jańa týǵan nárestelerge kútim jasaýǵa baılanysty shyǵystaryn ótemedi. Bosandyrýmen aınalysatyn medıtsına uıymdaryn jetkiliksiz qarjylandyrý olardyń sońǵy birneshe jyldyń ishinde qalyptasqan kredıtorlyq beresheginiń negizgi sebepteriniń birine aınaldy.
Tarıfterdi qaıta esepteý kezinde medıtsına mekemeleriniń patsıentterge qyzmet kórsetý kezinde kóteretin naqty shyǵyndary eskerildi. Qabyldanǵan sharalar medıtsına uıymdaryna qarjylyq turaqtylyqqa qol jetkizýge múmkindik beredi, bul óz kezeginde halyq úshin medıtsınalyq kómektiń sapasy men qoljetimdiligin jaqsartady. Al perzenthanalarda bolý ana men bala úshin yńǵaıly ári qaýipsiz bolady.
Densaýlyq saqtaý mınıstrligi Qazaqstandaǵy árbir otbasy qoljetimdi jáne sapaly medıtsınalyq kómekke sene alatyndaı densaýlyq saqtaý júıesin jetildirý jumystaryn jalǵastyrady. Osy baǵytta 2024 jylǵy 1 maýsymnan bastap balalar nevrologııasy, balalar allergologııasy, revmatologııa boıynsha medıtsınalyq kómek kórsetetin uıymdar úshin tarıfterdiń mólsheri ulǵaıtyldy.
