DSM pedıatrııalyq kómektiń gıbrıdti modelin engizýdi qarastyryp jatyr
ASTANA. KAZINFORM - Balalardyń densaýlyǵyn saqtaý qyzmetin odan ári damytý pedıatrlar men jalpy praktıka dárigerleriniń jumysyn úılestiretin, sonymen qatar pedıatrııalyq ýchaskelerdi saqtaýdy kózdeıtin balalarǵa medıtsınalyq kómek kórsetýdiń gıbrıdti modelin kezeń-kezeńimen engizý negizinde júzege asyrylmaq. Bul týraly QR Densaýlyq saqtaý mınıstrliginiń alqa otyrysynda mınıstr Aqmaral Álnazarova málim etti.
- Reformalar reformanyń ózi úshin emes, azamattarymyzdyń densaýlyǵy men ómir súrý sapasyn jaqsartý úshin júrgizilip jatyr. Sondyqtan biz qoldanystaǵy tásilderdi qaıta qarap, úzdik halyqaralyq praktıkalardy eskerýge jáne patsıentterdiń qajettilikteri men elimizdiń naqty jaǵdaıyna saı sheshimder qabyldaýǵa daıynbyz, – dep atap ótti vedomstvo basshysy.
Mınıstrdiń aıtýynsha, eldegi qoldanystaǵy pedıatrııalyq ýchaskeler saqtalady. Búginde olardyń sany shamamen 1300-di quraıdy, al medıtsınalyq-sanıtarııalyq alǵashqy kómek (MSAK) jelisindegi ýchaskelerdiń jalpy sany – 13 375. Sonymen qatar pedıatrlardy yntalandyrý maqsatynda qosymsha ústemaqylar men mamandardy qoldaý sharalaryn qamtıtyn jańa yntalandyrý júıesi engiziledi.
Pılottyq jobanyń sheńberinde Densaýlyq saqtaý mınıstrligi balalarǵa medıtsınalyq kómek kórsetýdiń aralas júıesi tabysty qoldanylyp júrgen elderdiń halyqaralyq tájirıbesine negizdelgen gıbrıdti modeldi synaqtan ótkizedi.
Jańa modelge sáıkes, pedıatrlar erte jastaǵy balalardy baqylaýǵa jáne kúrdeli klınıkalyq jaǵdaılardy qadaǵalap-qaraýǵa negizgi jaýapkershilik alady. Al jalpy praktıka dárigerleri medıtsınalyq-sanıtarııalyq alǵashqy kómek deńgeıinde patsıentterdiń jalpy aǵynymen jumysyn jalǵastyrady.
-Biz komandalyq jumys qaǵıdatyn saqtaı otyryp, pedıatrlardyń rólin olardyń quzyreti asa qajet bolatyn baǵyttarda – erte jastaǵy balalarmen jumys pen kúrdeli aýrýlardy emdeýde kúsheıtemiz. Sonymen qatar joǵary oqý oryndarynyń bilim berý baǵdarlamalary sheńberinde de, medıtsınalyq uıymdardyń ózinde de jalpy praktıka dárigerleriniń daıarlyq deńgeıin arttyratyn bolamyz, – dedi mınıstr.
-2026 jylǵy 1 qyrkúıekten bastap jalpy praktıka dárigerlerin daıarlaý tájirıbege baǵdarlanǵan sıpatqa ıe bolady. Bilim berý úderisindegi negizgi nazar statsıonarlardyń klınıkalyq bazalarynan medıtsınalyq-sanıtarııalyq alǵashqy kómek uıymdaryna aýystyrylady. Óıtkeni bolashaq mamandar halyqpen jumys isteýdiń negizgi daǵdylaryn dál osy deńgeıde meńgeredi, - delingen habarlamada.
Qazirgi tańda elimizde shamamen 7 mıllıon bala turady, bul halyqtyń jalpy sanynyń 34 paıyzyn quraıdy. Sońǵy on jyldyń ishinde balalardyń sany 1,5 mıllıon adamǵa artqan.
Osyǵan deıin habarlaǵanymyzdaı, densaýlyq saqtaý mınıstrligi eldegi pedıatrııalyq qyzmetti kúsheıtip jatyr.
