DSM onkologııamen kúreske 474 mlrd teńge surap otyr

ASTANA. QazAqparat – Onkologııamen kúreske arnalǵan medıtsınalyq jabdyqtar men dárilik preparattardy satyp alýǵa, mamandardy oqytyp, zamanaýı onkologııa ortalyqtaryn salýǵa jáne nysandardy kúrdeli jóndeýge shamamen 474 mlrd teńge qajet, dep habarlaıdy QazAqparat tilshisi.

Densaýlyq saqtaý mınıstri Ajar Ǵınııat Úkimet otyrysynda osylaı dep málim etti.

«Onkologııa patsıentterine arnalǵan mobıldik brıgadalar jelisin, ınvazıvti emes jáne morfıni bar dárilik zattar spektrin, ońaltý kómegin keńeıtý jáne densaýlyq saqtaý mamandaryn patsıentterdi birtindep aýyrsyzdandyrý ádistemesine oqytý jónindegi is-sharalar qarastyrylǵan.

Keshendi jospardy iske asyrý úshin medıtsınalyq jabdyqtardy, dárilik preparattardy satyp alýǵa, mamandardy oqytýǵa, zamanaýı onkologııa ortalyqtaryn salýǵa, rekonstrýktsııalaýǵa jáne kúrdeli jóndeý júrgizýge shamamen 474 mlrd teńge qajet bolady», - dedi ol.

Aıtýynsha, bul qarajat respýblıkalyq jáne jergilikti bıýdjetterdiń esebinen, «Qazaqstan halqyna» qoǵamdyq qory jáne ınvestorlardan tartylmaq.

«Sondaı-aq, memlekettik jekemenshik áriptestik mehanızmderi de qoldanylady», - dedi ol.