Onkologııalyq aýrýlardy emdeýge jumsalatyn qarjy nege 20% qysqartyldy - DSM túsindirmesi
ASTANA. KAZINFORM - QR Densaýlyq saqtaý mınıstrligi depýtat Ashat Aımaǵambettiń jazbasyna jaýap bere otyryp, nelikten onkologııalyq aýrýlardy emdeýge jumsalatyn qarjy 20% qysqartylǵanyn túsindirdi.
Buǵan deıin QR Parlamenti Májilisiniń depýtaty Ashat Aımaǵambetov vedomstvonyń bul sheshimin synap, jazba jarııalaǵan edi.
"Bıýdjetten onkologııalyq aýrýlardy emdeýge bólinetin qarajat densaýlyq saqtaý mınıstriniń buıryǵymen orta eseppen 20%-ǵa qysqartyldy.
Bul qujat jetkilikti talqylaýsyz, jabyq formatta qabyldandy. Ókinishke oraı, qajetti zertteýler men tıisti esepteýlersiz barlyq klınıkalyq shyǵyndar toby (KGZ) boıynsha onkologııany emdeý úshin bıýdjetten bólinetin qarajat qysqartyldy.
Bul sheshim qansha adam ómiri men taǵdyryna áser etedi? Bul buıryqtan kim zardap shegedi? Sheneýnikterdiń ústirt málimetterinen basqa qandaı ǵylymı negiz bar? Nelikten mundaı mańyzdy sheshimder jan-jaqty zertteýsiz bir qalamnyń ushymen qabyldanady? Suraq óte kóp" dep jazǵan edi depýtat.
QR Densaýlyq saqtaý mınıstrligi óz jaýabynda vedomstvo aǵymdaǵy jyly medıtsınalyq uıymdarda onkologııalyq patsıentterge medıtsınalyq kómek kórsetýge taldaý júrgizgenin jáne birqatar zań buzýshylyqtar anyqtalǵanyn málimdegen.
"Іriktep tekserilgen alty uıymda medıtsınalyq kómek kórsetýdiń bekitilgen standarttary men qaǵıdalarynyń kóptegen buzýshylyqtary, sondaı-aq 18 mlrd. teńgeden astam somaǵa qarjylyq buzýshylyqtar anyqtaldy.
Sonymen qatar, 2023 jyldyń qorytyndysy boıynsha elimizdiń onkologııa ortalyqtary alǵan paıdanyń jalpy somasy 31,8 mlrd. teńgeden asty.
Tegin medıtsınalyq kómektiń kepildik berilgen kólemi sheńberinde kórsetiletin medıtsınalyq qyzmetterge tarıf belgileý týraly buıryqqa sáıkes tarıfter paıda alýdy, sondaı-aq negizgi quraldardy satyp alýǵa arnalǵan shyǵystardy kózdemeıdi.
Paıda alý úshin emdeýge jatqyzý jaǵdaılaryn jasandy túrde bólshekteý faktileri, esepten shyǵarylǵan jáne taǵaıyndalǵan hımııalyq preparattardyń sáıkes kelmeýi, usynylǵan jaǵdaılardyń emdeý standarttaryna sáıkes kelmeýi jáne tarıfterdiń naqty shyǵyndardan asyp ketýi anyqtaldy" delingen jaýapta.
Mınıstrliktiń málimdeýinshe, osylaısha, qoldanystaǵy tarıfter men tólem ádisteri memlekettiń aqshalaı qarajatynyń medıtsınalyq uıymdardyń shottaryna zańsyz aǵynyna yqpal etken.
"Anyqtalǵan buzýshylyqtardyń nátıjeleri boıynsha 6 birinshi basshy tártiptik jaýapkershilikke tartylady, onyń 2-eýi atqaratyn laýazymdarynan bosatýǵa usynyldy. Tekserý materıaldary quqyqtyq baǵalaý úshin quzyretti organdarǵa beriletin bolady.
Qazirgi ýaqytta árbir memlekettik teńge barynsha tıimdi paıdalanylýy jáne barlyq qarajat medıtsınalyq kómekke muqtaj patsıentterge jetýi úshin naqty qadamdar jasalýda.
Bıýdjet qarajatyn orynsyz paıdalanýǵa jol bermeý úshin shuǵyl shara retinde Densaýlyq saqtaý mınıstrligi alqa otyrysy barysynda onkologııalyq qyzmettiń klınıkalyq-shyǵyndy toptary boıynsha bazalyq mólsherlemeni 20%-ǵa tómendetý týraly sheshim qabyldady.
Sondaı-aq, tarıfterdi neǵurlym naqty ońtaılandyrýmen osy uıymdardyń qyzmetterine aqy tóleý tetigin qaıta qaraý josparlanýda" dep jazylǵan habarlamada.
Sonymen qatar, qarajattyń paıdalanylýyn baqylaý kúsheıtiletini de aıtylǵan.
"Medıtsınalyq uıymdardyń qarjylyq qyzmetine turaqty monıtorıng jáne aýdıt júıesi engizildi. Bul bıýdjet qarajatyn orynsyz paıdalaný jaǵdaılaryn jedel anyqtaýǵa jáne joıýǵa múmkindik beredi.
Memleket basshysynyń 2024 jylǵy 7 aqpandaǵy sala qarajatynyń oryndy jáne tıimdi paıdalanylýyna baqylaýdy engizý jónindegi tapsyrmalaryn iske asyrý jónindegi jumys jalǵastyrylady jáne mindetter oryndalatyn bolady" dep túıindelgen jazba.
