DSM ókili vaktsına pasportyn satyp alatyndarǵa úndeý jasady
«Pasporttyń ras-ótirigin tekserý múmkin emes, adamnyń ózi vaktsına almaǵanyn, jalǵan qujat jasatqanyn moıyndasa ǵana ashylady. Bul rette, qurmetti qazaqstandyqtar, sizder vaktsınalaý pasportyn satyp alǵanda kem degende reanımatsııaǵa bılet satyp alǵanyńyzdy eskerińiz. Sondyqtan, memleket tegin qorǵanýǵa múmkindik berip otyrǵanda jáne siz óz qarajatyńyzdy jalǵan pasportqa jumsaǵanda, joǵaryda aıtqanymdaı, aýyryp qalýǵa tipti qaıtys bolýǵa joldama alǵanmen teń bolasyz. Sondyqtan, ózderińiz oılanyp kórińizder», - dedi A. Esmaǵambetova Ortalyq kommýnıkatsııalar qyzmetinde ótken brıfıngte.
Sonymen birge, spıker qoldan jasalǵan pasport úshin jaýapkershilik qarastyrylǵanyn eske saldy.
«Pasportty qoldan jasaý úshin de, qoldan jasaý protsedýrasy úshin de, ony satyp alý úshin de jaýapkershilik qarastyrylǵan. Densaýlyq saqtaý mınıstrliginiń ózi vedomstvoaralyq komıssııada jalǵan vaktsınalaý pasporttary máselesin kóterdi. Іshki ister mınıstrligi qoldan jasalǵan pasporttar boıynsha birqatar qylmystyq is qozǵady. Ásirese, vaktsınalaýdyń tıimdiligine kúmán keltirip jatqanda buǵan jol berýge bolmaıdy. Vaktsınalaý pasportyn satyp almaı turyp, ózińizdiń jáne jaqyndaryńyzdyń densaýlyǵyna qaýip tóndiretinińizdi oılańyz, sebebi vırýs tasymaldaýshysy bolýyńyz ábden múmkin», - dedi Aıjan Esmaǵambetova.