DSM ókili Qytaıdan jetkizilgen qazaqstandyqtardyń densaýlyǵy jaıynda aıtty

NUR-SULTAN. QazAqparat - Búgin tańerteń Beıjińnen jetkizilgen 171 qazaqstandyq aýrýhanaǵa jatqyzyldy. Bul týraly QR Densaýlyq saqtaý mınıstrliginiń resmı ókili Dıas Ahmetshárip aıtty, dep habarlaıdy QazAqparat tilshisi.

«Búgin tańerteń saǵat 07-00-de Beıjińnen Almaty qalasyna «Eır Astana« áýe kompanııasynyń 211 jolaýshysy bar arnaıy ushaǵy qondy. Ushaqta Qazaqstannyń 171, Qyrǵyzstannyń 40 azamaty bolǵan. Dene qyzýy men koronavırýs sımptomdary bar azamattar anyqtalǵan joq. Bortqa otyrǵyzý kezinde maskalardy aýystyrý protsedýralary uıymdastyryldy», - dedi ol.

Dıas Ahmetsháriptiń atap ótýinshe, qazaqstandyqtar ınfektsııalyq baqylaýdyń barlyq talaptaryn saqtaı otyryp, Almatydaǵy kópsalaly klınıkalyq aýrýhanaǵa jetkizildi. Ol jerde barlyq azamattar medıtsınalyq tekserýden ótip, koronavırýs pen JRVI-ǵa qarsy zerthanalyq analız tapsyrady.

«Statsıonarda 3 kún bolady. Eger qosymsha medıtsınalyq kórsetilim bolsa aýrýhanada jatý ýaqyty uzarady. Al Qyrǵyzstan azamattarynyń barlyǵy Bishkekke jetkizildi», - dedi resmı ókil.