DSM-niń Transfýzıologııa ǵylymı-óńdiristik ortalyǵyn qurý týraly sheshim qabyldandy

«Elbasy N.Á.Nazarbaevtyń tapsyrmasy boıynsha 2007 jyly Qazaqstan Respýblıkasynyń Úkimeti Qan qyzmetin damytýdyń salalyq baǵdarlamasyn qabyldady, óńirlerde 10 jańa qan ortalyǵy salyndy, qazirgi zamanǵy jabdyqtar ornatylyp, mamandar óz biliktiligin arttyrdy. Memleket qan qyzmetin tehnıkalyq jaǵynan jańartý boıynsha keshendi sharalar qabyldaýda», - dep habarlady QR Densaýlyq saqtaý mınıstrliginiń baspasóz qyzmeti.

Respýblıkada qan qyzmetin oblystyq ortalyqtardaǵy jáne Astana, Almaty qalalaryndaǵy 23 qan ortalyǵy atqarady. Respýblıka boıynsha qan tapsyrý sany jaǵynan qajetti kólemde daıyndaldy.

Sonymen qatar qan qyzmetin damytý óndiristik jáne klınıkalyq transfýzıologııanyń túrli máseleleri boıynsha ǵylymı-qoldanbaly zertteýlerdi, ǵylymı zerttemelerdi, usynystardy jáne qyzmet standarttaryn qajet etedi.

Qan qyzmetine halyqaralyq sapa standarttaryn engizýdiń, transfýzıologııa dara mektebin qurýdyń, transfýzıologtardyń halyqaralyq qaýymdastyǵyna jaqyndastyrý qajettiligi Transfýzıologııa ǵylymı-óńdiristik ortalyǵyn uıymdastyrýdy talap etti. Ortalyqqa Qazaqstan Respýblıkasy qan qyzmetiniń is-qımylyn úılestirý, óndiristik jáne klınıkalyq transfýzıologııa salasynda ǵylymı-zertteý jumystaryn júrgizý, sapany basqarý júıesin engizý jáne respýblıka qan qyzmetin halyqaralyq standarttarǵa sáıkestendirý barysynda akkredıtatsııadan ótýge daıyndaý, sheteldik zaýyttarda qan preparattaryn daıyndaý maqsatynda plazmany kelisim-sharttyq fraktsııalaýdy damytý boıynsha qyzmetti úılestirý mindetteri júktelgen.

2009 jyly «100 mektep, 100 aýrýhana» atty memlekettik baǵdarlama sheńberinde salynǵan Astana qalasynyń Qan ortalyǵy búgingi kúni qalalyq jáne respýblıkalyq medıtsına uıymdaryn qamtamasyz etedi. 2010 jyly daıyndalǵan qannyń kólemi 25 tonnany qurady, bul byltyrǵy deńgeıden 42%-ǵa artyq.

Ortalyqta jumys isteý men mamandardyń kásibı biliktiligin damytý úshin barlyq jaǵdaı jasalǵan. 2009-2010 jyldar ishinde Izraıl, Polsha, Chehııanyń aldyńǵy qatarly qan ortalyqtarynda óz biliktiligin 30 qyzmetker arttyryp, Reseıdiń ǵylymı ortalyqtarynyń aspırantýrasynda oqyp júr.

Astana qalasynyń Qan ortalyǵynda qan daıyndaý jaǵdaıy eń joǵary halyqaralyq standarttarǵa sáıkes keledi. Munda qan komponentterin zerthanalyq dıagnostıkalaýdyń, avtomatty túrde daıyndaý jáne qaıta óndeýdiń qazirgi zamanǵy tehnologııalary iske engizildi. Immýnologııalyq jáne ınfektsııalyq qaýipsizdikti qamtamasyz etýdiń birneshe ádisteri qoldanylyp júr, olar leıkofıltrleý, vırýstazartý, karantındeý.

Respýblıkada alǵash ret gemotranssıvtik ınfektsııalardy PTR (polımerazdy tizbekti reaktsııa) - dıagnostıkalaýdyń tolyq avtomattandyrylýy júzege asyryldy jáne S gepatıtin anyqtaýǵa arnalǵan ımmýnoblotıng engizildi.

Óndiristik protsesterdi aqparattyq qoldaýdyń tolyq avtomattandyrýyna qol jetkizildi. Qan komponentteri sapasyna zerthanalyq baqylaý júrgizý protsesi avtomattandyrylǵan.

Qan ortalyǵynda donorlardy tirkeýden bastalatyn, skrınıng jáne óndiris protsesterin qosa alǵanda, daıyn ónimdi shyǵarý jáne transfýzııalyq kómek kórsetýge deıingi barlyq kezeńderde sapany basqarý júıesi engizilip jatyr. Kórsetilgen sharalar keshenin oryndaý transfýzııanyń qaýipsizdigin qamtamasyz etýge baǵyttalǵan.

Respýblıka qan qyzmeti is-áreketteriniń sapasyn arttyrý maqsatynda sapany basqarý júıesi óńirlik jaǵdaılarǵa beıimdelip, el boıynsha taratylady. Sonymen qatar, otandyq qan qyzmetin halyqaralyq akkredıtatsııaǵa daıyndaý sharalary qabyldanady.

Respýblıka qan ortalyqtary qyzmetiniń turaqty ınspektsııasy qurylyp, qazirgi kezde osy sharalar iske asyrylyp jatyr.