DSM medıtsınalyq JOO stýdentteriniń bilimin baǵalaıtyn táýelsiz baǵalaý ortalyqtaryn qurady
ASTANA. 2 naýryz. QazAqparat /Gúlmıra Álıakparova/ - 2012-2013 jyldary Qazaqstanda medıtsınalyq JOO-da oqıtyn stýdentterdiń bilimin baǵalaıtyn Baǵalaý ortalyqtary qurylady.
Bul týraly búgin Astanada «Medıtsınalyq bilim: keshe, búgin, bolashaqta» taqyrybynda ótken halyqaralyq ǵylymı-tájirıbelik konferentsııada QR Densaýlyq saqtaý mınıstrligi Ǵylym jáne adamı resýrstar departamentiniń dırektory Nurgúl Hamzına málim etti.
«Búgin bizde bilim berý úrdisi bilim deńgeıin baǵalaý úrdisinen ajyratylmaǵan, ıaǵnı JOO ózi oqytady, baǵalaıdy, dıplom beredi. Osy tártippen túlekterdiń 99,9 paıyzy dıplom alyp shyǵady. Álemdegi ozyq elderdiń tájirıbesine súıenip, biz medıtsınalyq JOO-lar túlekteriniń táýelsiz synaqtamasyn engizetin bolamyz», - dedi ol.
N.Hamzınanyń aıtýynsha, ázirshe synaqtama tolyǵymen táýelsiz bolmaıdy jáne ol Densaýlyq saqtaý mınıstrliginiń baqylaýynda bolady. Medıtsınalyq JOO-lar túlekteriniń bilimin baǵalaıtyn alǵashqy Baǵalaý ortalyǵyn 2012-2013 jyldary qurý josparlanýda.
«Dúnıejúzilik bank jobasynyń sheńberinde Astana jáne Almaty qalalarynda eki táýelsiz synaqtama ortalyǵy qurylatyn bolady. Ázirshe túlekterden bastaımyz keıin, paıymdaýymyzsha, bul sertıfıkatsııadan osy salada jumys jasaıtyn barlyq dárigerler ótýi tıis», - dedi ol.
Sondaı-aq, Departament dırektorynyń málimetinshe, 2012-2013 jyldary Qazaqstannyń 16 óńirinde mýlıajdarmen jáne fantomdarmen jabdyqtalǵan sımýlıatsııalyq ortalyqtar qurylady. «Álemde naýqastardyń qaýipsizdigin qamtamasyz etý úshin dárigerler bilimderin sımýlıatorlarda jetildiredi. Osy ortalyqtardaǵy komandalyq jumystar eńbek etip júrgen mamandardyń bilimin bekitýge kómektesedi», - dedi N.Hamzına.
