DSM medıtsınalyq qural-jabdyqtardy satyp alýdyń jańa erejesin ázirledi
«Biz úsh jyldyń ishinde satyp alynǵan medıtsınalyq qural-jabdyqtarǵa aýdıt júrgizdik. Kóterińki baǵaǵa satyp alý faktileri anyqtaldy. Medıtsınalyq qural-jabdyqtar shyǵarýshy eli kórsetilmesten, kepildi qyzmet kórsetý merzimi saqtalmastan satyp alynǵan. Bul faktilerdiń barlyǵyn Esep komıtetine berdik. Memleket basshysynyń tapsyrmasy boıynsha Esep komıteti áleýmettik blokqa tekserý júrgizgen edi. Birqatar fakti quqyq qorǵaý organdaryna jiberildi»,- dedi mınıstr búgin densaýlyq saqtaý salasyndaǵy úkimettik emes uıymdardyń ókilderimen kezdesý barysynda.
Onyń aıtýynsha, mınıstrlik medıtsınalyq qural-jabdyqtardy ortalyqtandyrylǵan satý alýdan bas tartyp, jańa ereje ázirlegen.
«Qazirgi ýaqytta atalǵan ereje memlekettik organdarmen kelisilýde. Onda eger qural-jabdyq bıýdjet esebinen satyp alynatyn bolsa, onda mindetti túrde saraptama júrgizilýi tıistigi kórsetilgen. Satyp alynǵan qural-jabdyqtyń ne mamannyń, ne qajettiliktiń bolmaýynan qańtarylyp bos turatyndyǵy jıi kezdesetindigi qupııa emes», - dedi ol.
Mınıstr medıtsınalyq ınfraqurylymdy damytýǵa jeke ınvestıtsııa tartý jumystaryn kúsheıtý qajettigin atap ótti.
«Biz birqatar shara, ádis ázirlep, 20-ǵa jýyq kelisimshart jasasa aldyq. Jeke ınvestorlardyń esebinen medıtsınalyq qural-jabdyqtar satyp alyndy. Bul jumystardy odan ary da jalǵastyra beremiz. Jalpy, kóp jaǵdaıda memlekettiń qarjysynsyz-aq qymbat qural-jabdyqty satyp alýǵa bolady. Al ol aqshalar tarıfterdi arttyrýǵa jumsalǵany jaqsy jáne biz naryqta jetkizýshilerden sapaly qyzmetter alatyn bolamyz», - dedi Birtanov.