DSM kóktaıǵaq kezinde saq bolýǵa shaqyrdy
Mamandar jer taıǵaq bolǵanda eń aldymen qolaıly aıaq kıim kııýge keńes beredi. Aıaq kıimniń ókshesi (3-4 santımetrden bıik emes) ornyqty, tumsyq jaǵy keń, budyrly, tabany qalyń, yńǵaıly, tabany neǵurlym úlkenirek bolýy tıis.
«Asyqpaı, baıaý júrý úshin úıden erterek shyǵý erejesin ustanyńyz. Qoldy qaltaǵa salmańyz jáne qol sómkeni qolyńyzǵa ilip almańyz - tepe-teńdikti tez qalpyna keltirý úshin qozǵalýǵa yńǵaıly bolýǵa qoldardyń erkin qozǵalysy qajet. Iyqqa asatyn, tutqasy uzyn sómkeden bas tartyńyz, oń jaq jáne sol jaq qolǵa aýyrlyq birdeı bolatyndaı, sómkeni eki qolmen ustańyz», - dep keńes beredi mamandar.
Kók taıǵaq kezinde qart adamdarǵa súıir kertigi bar taıaqsyz nemese rezeńke ushy bar trossyz úıden shyǵýǵa bolmaıdy. Eger siz uzyn palto nemese ton kıgen bolsańyz, kólikten túsetin kezde nemese baspaldaqpen túsip kele jatqanda mindetti túrde kıimniń etegin jartylaı kóterip alyńyz.
«Ketip bara jatqan avtobýstyń artynan qýa jónelmeńiz, aıaǵyńyz taıyp, qulap ketýińiz múmkin. Eger qulamaýǵa bolmaıtyn jaǵdaıdy sezinseńiz, artyq zattardyń barlyǵyn laqtyryp tastaýǵa tyrysyńyz. Sómkeniń ishinde synatyn nárse bolsa, jaǵdaı nasharlaýy múmkin. Eger arqańyzben emes, bir búıirlep jerge qulasańyz jeńil jaraqatpen qutylýǵa bolady. Eger sonda da jaraqat alyp, qulap qalsańyz, travmatologııalyq pýnktke qaralyńyz», - delingen habarlamada.
Densaýlyq saqtaý mınıstrligi kóktaıǵaq jaǵdaıynda jol-kólik apattarynyń aldyn alý jóninde de keńes beredi.
«Eger siz kóktaıǵaq kezinde dalaǵa shyqsańyz, bul jaǵdaıda qaýipsiz qozǵalysty qamtamasyz etý úshin negizgi qaǵıdalardy umytpańyz: qozǵalys bastalmas buryn, burylǵanda, aınalǵanda, qatardy qaıtadan túzegende nemese toqtaǵanda tıisti sıgnaldardy berýdi umytpańyz. Eń mańyzdy saqtyq sharasy - kedergisiz toqtaýǵa jáne tejeýge múmkindik beretin qaýipsiz qashyqtyqty saqtaý bolyp tabylady. Artta kele jatqan kóliktiń júrgizýshisin aldaǵy tejeý týraly eskertý úshin, jypylyqtaıtyn toqtaý sıgnalymen nazar aýdara otyryp, tejegish basqyshyn birneshe ret túrtýge bolady. Júrgizýshi joldy kesip ótetin adamdarǵa jol berýi tıis, al jaıaý júrginshiler bul úshin arnaıy belgilengen oryndarda barynsha abaılap ótýge mindetti ekenin este saqtaǵan jón», - dep keńes beredi mamandar.