DSM: Qazaqstanda vaktsınadan bas tartqandar sany 5 ese artty
ASTANA. KAZINFORM — Bul týraly Densaýlyq saqtaý mınıstrligi Kazinform agenttiginiń resmı saýalyna bergen jaýabynda málim etti.
Atalǵan vedomstvonyń málimetinshe, sońǵy ýaqytta Qazaqstanda ǵana emes, búkil álemde vaktsınatsııadan bas tartý úrdisi baıqalyp otyr.
– Ókinishke qaraı, sońǵy jyldary búkil álemde jáne elimizde vaktsınatsııadan bas tartý úrdisi beleń alyp keledi. Máselen, elimizde sońǵy 9 jylda vaktsınatsııadan bas tartý jaǵdaıy 4,8 ese ósti. Sandarǵa kóz júgirtsek, 2017 jyly 5 myńnan assa, 2025 jyly 25 myńǵa jetti, – delingen mınıstrliktiń jaýabynda.
Vedomstvonyń atap ótýinshe, bul jaǵdaı ımmýndaýdan ótpegen adamdar sanynyń artýyna áser etip, vaktsına almaǵan azamattar arasynda juqpaly aýrýlardyń taralý qaýpin kúsheıtedi.
Sonymen qatar mınıstrlik vaktsınatsııanyń arqasynda eldegi birqatar ınfektsııalyq aýrýdyń kórsetkishi aıtarlyqtaı tómendegenin habarlady. Atap aıtqanda, sońǵy 35 jylda epıdemııalyq parotıtpen syrqattanýshylyq 94 ese, A vırýstyq gepatıti 80 ese, al V vırýstyq gepatıti 94 ese azaıǵan.
Budan bólek, Qazaqstanda polıomıelıt 1996 jyldan beri, dıfterııa 2009 jyldan beri tirkelmegen. 2002 jyly elimiz polıomıelıtten azat aýmaq retinde sertıfıkattalǵan.
Buǵan deıin vaktsınadan bas tartqandardyń basym bóligi 2 jasqa deıingi balalarǵa qatysty ekenin jazdyq.
