DSM: Qazaqstanda dáriger tapshylyǵy 19,6% azaıdy
ASTANA. KAZINFORM — QR Densaýlyq saqtaý mınıstrligi medıtsınalyq kadrlardy daıarlaý jáne bekitý júıesin qaıta qarap jatyr, dep habarlaıdy vedomstvonyń baspasóz qyzmeti.
Mınıstrlik deregine sáıkes, mamandardyń tapshylyǵyn tómendetý jáne olardyń biliktiligin arttyrý úshin mınıstrlik aqyly bólimge túsýshiler úshin UBT shegin 80-90 balǵa deıin kóterdi jáne úshinshi kýrstan keıin bilimin mindetti tekserýdi engizdi, onyń qorytyndysy boıynsha úlgermegen stýdentter oqýdan shyǵarylady.
— Teorııa men praktıkanyń arasyndaǵy alshaqtyqty azaıtý úshin oqý josparlaryna bir ýaqytta 300 saǵattyq beıindik pánder qosyldy. Kadrlardy daıarlaý endi JOO, stýdent jáne aýrýhana arasyndaǵy úshjaqty sharttar júıesi arqyly olardyń bolashaq jumysqa ornalasýymen tikeleı baılanysty — mundaı mindettemelerdi rezıdentterdiń 70%-y resimdegen. Jas mamandardyń praktıkalyq jelige jedel shyǵýy úshin terapııa, pedıatrııa jáne hırýrgııany qosa alǵanda, alty negizgi baǵyt boıynsha ınternatýra qalpyna keltirildi. Bul sharalar aýyldyq densaýlyq saqtaýdy kadrlarmen belsendi túrde tolyqtyrýǵa múmkindik berdi, — delingen habarlamada.
Jergilikti jerlerde dárigerlerdi bekitý úshin memleket áleýmettik qoldaýdy eki esege arttyrdy: 2025 jyly tapshy mamandyqtaǵy 529 dáriger 8,5 mln teńgeden kóterme járdem aldy.
Jeńildikter men qyzmettik turǵyn úıdi paıdalanǵan dárigerler sanynyń jalpy ósýi 30%-dy qurady, bul aýyldarǵa myńnan astam mamannyń kelýin qamtamasyz etti.
Mınıstrlik qarjylyq yntalandyrýmen qatar medıtsınalyq personaldy qorǵaý quraldaryn engizip jatyr. ІІM-men birlesip medıtsınalyq mekemelerde polıtsııa posttary ornatylady, al jedel járdem feldsherleri úshin beınejetondar satyp alynady.
Sonymen qatar, 190 myń qyzmetkerdi qamtyǵan kásibı jaýapkershilikti saqtandyrý ınstıtýty damyp keledi, onyń qyzmeti qazir 3,1 mlrd teńge kóleminde saqtandyrý qorymen qorǵalǵan.
Keshendi sharalardyń nátıjesinde Qazaqstanda dárigerlerdiń jalpy tapshylyǵy 19,6%-ǵa, al aýyldyq jerlerde 26,7%-ǵa tómendedi.
Buǵan deıin nımesıldi jıi qoldaný qanshalyqty qaýipti jáne ol Eýropada nege satylmaıtynyn anyqtaǵan edik.