DSM qaterli isik pen júıeli qyzyl jegini emdeıtin zamanaýı dáriler satyp alady
ASTANA. KAZINFORM — Densaýlyq saqtaý mınıstrligi biryńǵaı dıstrıbıýtordan satyp alynatyn dárilik zattar men medıtsınalyq buıymdardyń tizbesine ózgerister men tolyqtyrýlar engizbek.
2026 jylǵy 13 naýryzda DSM Formýlıarlyq komıssııasynyń otyrysy ótti. Onda satyp alý tizimin jetildirý máselesi talqylandy. Tıimdiligi dáleldengen dárilerdi tizbege engizý usynystary qaralyp, birqatar sheshim qabyldandy.
Tizbege jańa zamanaýı preparattardy qosý josparlanyp otyr:
• Lorlatınıb — ókpeniń usaq jasýshaly emes qaterli isigine shaldyqqan patsıentterdi emdeý úshin engiziledi. Preparattyń shıpalyq qasıeti dáleldengen, klınıkalyq tıimdiligimen erekshelenedi jáne em nátıjelerin jaqsartady;
• Anıfrolýmab — júıeli qyzyl jegimen aýyratyn naýqastardy emdeý úshin qoldanylady. Bul aýyr aýtoımmýndy dertteri bar naýqastarǵa medıtsınalyq kómek kórsetý múmkindikterin keńeıtedi.
Sondaı-aq tizimdi jańartý qarastyrylǵan:
• Krızotınıbtiń (200 mg jáne 250 mg kapsýlalar) ornyna — 2027 jyldyń 1 qańtarynan bastap lorlatınıb zamanaýı preparatyna kezeń-kezeńimen kóshý josparlanyp otyr;
• Tsıprofloksatsınniń (750 mg tabletka) — balamaly nusqalary bar ekeni eskerilip, dozany qoldaný qaıta qaralady.
DSM málimdeýinshe, usynylyp otyrǵan ózgeristerdiń maqsaty — em-domnyń zamanaýı ádisterin engizý, naýqastarǵa shıpa beretin preparattardy qoljetimdi qylý jáne bıýdjet qarajatyn tıimdi paıdalaný. Sondaı-aq mınıstrlik halyqaralyq standarttarǵa, preparattardyń klınıkalyq tıimdiligine jáne patsıentterdiń qajettilikterine baılanysty dárilik zattardyń tizbesin jetildirý boıynsha júıeli jumysty jalǵastyrady.
Buıryqtyń jobasy «Ashyq NQA» portalynda jarııalanyp, 20 sáýirge deıin talqylaýǵa usynyldy.
Aıta ketelik qazaqstandyqtar qandaı preparattardy jıi satyp alatyny týraly jazǵan edik.
