DSM: Insýlttan ólim-jitim kórsetkishi 25%-ǵa azaıdy
ASTANA. KAZINFORM — Elimizde ınfarkttan bolatyn ólim 3,2%-ǵa, ınsýlttan bolatyn ólim — 25%-ǵa tómendedi, dep habarlaıdy Densaýlyq saqtaý mınıstrliginiń baspasóz qyzmeti.
Qazaqstanda kardıologııalyq qyzmettiń damýy ınfarkttan bolatyn ólimdi tómendetýge jáne ınsýlt kezinde statsıonarlyq ólimdi aıtarlyqtaı azaıtýǵa múmkindik berdi.
— Qazaqstanda ınsýltke arnalǵan 85 ortalyq jáne 82 koronarografııa bólimshesi jumys isteıdi. Júrekke jasalatyn joǵary tehnologııalyq operatsııalardyń sany arttyryldy. Bul ınfarkttan bolatyn ólimdi 3,2%-ǵa, al ınsýlttan bolatyn statsıonarlyq ólimdi 25%-ǵa tómendetýge múmkindik berdi, — delingen habarlamada.
Mı qan aınalymy buzylystarynyń (ınsýltterdiń) profılaktıkasy maqsatynda Densaýlyq saqtaý mınıstrligi mindetti áleýmettik medıtsınalyq saqtandyrý júıesi sheńberinde 50 jastan asqan er adamdardyń arasynda 2 jylda 1 ret brahıotsefalııalyq tamyrlardyń ýltradybystyq zertteýin júrgizý arqyly skrınıng engizdi.
2025 jyldyń qorytyndysy boıynsha Qazaqstan ınfektsııalyq emes aýrýlardan bolatyn ólimdi 25%-ǵa tómendetý kórsetkishine qol jetkizgen Dúnıejúzilik densaýlyq saqtaý uıymynyń Eýropalyq óńirindegi alǵashqy on eldiń qataryna kirdi.
Osydan buryn qazaqstandyqtarǵa kardıologııa men onkologııadaǵy terapııanyń jańa ádisteri qoljetimdi bolatynyn jazdyq.
