DSM hantavırýstyń aldyn alý joldaryn atady
ASTANA. KAZINFORM — Atlant muhıtyndaǵy krýızdik laınerde tirkelgen qaýipti ınfektsııadan keıin álem jurtshylyǵy taǵy da úreımen qaraıtyn boldy. Osyǵan baılanysty QR Densaýlyq saqtaý mınıstrliginiń ókili Jasulan Alpysbaev Jibek Joly telearnasynyń «Búgin.LIVE» baǵdarlamasynda hantavırýstyń qaýiptiligi men odan saqtanýdyń tıimdi joldary týraly egjeı-tegjeıli aıtyp berdi.
Hantavırýs — negizinen kemirgishter arqyly taraıtyn qaýipti dert. Adam aǵzasyna vırýs juqtyrǵan kemirgishterdiń silekeıi, nájisi sııaqty bólindilerimen tikeleı baılanysqanda juǵady. Sondaı-aq aýadaǵy shań-tozań bólshekteri arqyly da juqtyryp alý qaýipi bar.
Mamannyń aıtýynsha, bul dertke qarsy vaktsına joq, sondyqtan basty nazardy jeke gıgıena men saqtyqqa aýdarý qajet.
— Bul vırýs qyzylsha nemese koronavırýs sııaqty aýa-tamshy joldarymen ońaı taralmaıdy. Negizgi rezervýary — kemirgishter. Adamdar tyshqandar ómir súretin oryndarda dem alǵanda nemese solarmen tikeleı baılanysqa túskende ınfektsııa ókpege túsýi múmkin, — dedi QR DSM Sanıtarııalyq-epıdemıologııalyq baqylaý komıtetiniń basqarma basshysy Jasulan Alpysbaev.
Jasulan Alpysbaev gıgıena — eń basty saqtyq sharasy ekenin atap ótti.
— Shetelge, ásirese Ońtústik Amerıka elderine ekologııalyq týrızmmen baratyn azamattar kelesi qaǵıdalardy qatań saqtaýy tıis. Mysaly tamaq isher aldynda qoldy muqııat jýyp, jeke tazalyqty saqtaý kerek. Kóshe taǵamdarynan, stıhııalyq saýda oryndarynan as ishpeýge jáne tek qaınatylǵan nemese bótelkedegi sýdy paıdalanýǵa keńes beremin. Sonymen qatar tyshqandar kóp shoǵyrlanǵan mekenderge barmaýǵa tyrysý qajet. Eger ekspedıtsııa nemese arnaıy jobamen barý qajet bolsa, mindetti túrde saqtyq kıimin jáne maska kııý arqyly qorǵana alady, — dep eskertedi ol.
Sapardan kelgen soń 7-den 42 kúnge deıin sozylatyn ınkýbatsııalyq kezeńde bas aýrýy, álsizdik, tynys tarylýy baıqalsa, dereý medıtsınalyq kómekke júginý qajet.
— Dárigerge barǵanda qaı elde bolǵanyńyzdy ashyq aıtý óte mańyzdy. Hantavırýstyń alǵashqy belgileri JRVI-ge uqsas bolǵandyqtan, dárigerdiń durys protokol qoldanyp, sheshim qabyldaýyna osy aqparat kómektesedi, — dep túsindirdi maman.
Qazirgi ýaqytta elimizdiń memlekettik shekarasyndaǵy ótkizý pýnktterinde baqylaý sharalary kúsheıtilgen. Shetelden kelgen týrıster men azamattar arnaıy qurylǵylar arqyly tekseriledi. Eger adamda temperatýra nemese aýrý belgileri anyqtalsa, tıisti algorıtm boıynsha oqshaýlaý jáne emdeý sharalary júrgiziledi.
Eske sala keteıik, barlyǵy sáýirdiń basynda bastaldy. Argentınadan Kabo-Verdege baǵyt alǵan krýız kemesinde jeti adam vırýs juqtyrǵan. Olardyń úsheýi kóz jumǵan.
Sonymen qatar Izraılde Shyǵys Eýropadan oralǵan jolaýshydan alǵash ret hantavırýs tirkeldi.
Buǵan deıin DDU MV Hondius kemesindegi naýqastarmen baılanysta bolǵan adamdarǵa 42 kúndik karantın saqtaý jóninde keńes bergen edi.
Sondaı-aq hantavırýs anyqtalǵan krýızdik kemeden evakýatsııalanǵan sońǵy top Nıderlandqa ushatyny týraly jazdyq.
