DSM: Estý apparatyn alý úshin endi múgedektik mártebesi talap etilmeıdi
ASTANA. KAZINFORM — Qazaqstanda estý qabileti buzylǵan azamattar endi múgedektik mártebesine qaramastan, medıtsınalyq kórsetilim boıynsha estý apparattaryn ala alady. Densaýlyq saqtaý mınıstrligi jańa tetik arqyly estý ońaltý qyzmetterin qoljetimdi etýdi kózdep otyr. Bul týraly vedomstvonyń baspasóz qyzmeti málim etti.
Buǵan deıin estý apparattary áleýmettik qorǵaý júıesi sheńberinde estý qabiletiniń aýyr buzylysyna baılanysty múgedektigi bar azamattardyń jekelegen sanattaryna ǵana beriletin. Zańnamaǵa engizilgen ózgeristerden keıin mundaı kómekke sýrdolog dárigerdiń qorytyndysy boıynsha estý apparatyn qajet etetin patsıentterdiń keń aýqymy ıe boldy.
— Basty mindetimiz — estý qabileti buzylǵan adamdarǵa ýaqytyly kómek kórsetý. Estýdi erte kezeńnen ońaltý ómir sapasyn saqtaýǵa, bilim alýǵa, qarym-qatynas jasaýǵa jáne qoǵamǵa beıimdelýge múmkindik beredi, — dedi Janar Sádýova.
Estý apparatyn alý úshin patsıent sýrdolog dárigerdiń tekserýinen ótedi. Maman estý qabiletiniń tómendeý dárejesi men sıpatyn anyqtap, qajetti qurylǵyny tańdaıdy jáne medıtsınalyq qorytyndy rásimdeıdi.
Jańa qamtamasyz etý tetigi sheńberinde patsıentter tek estý apparatymen ǵana emes, sondaı-aq qyzmetterdiń tolyq keshenimen qamtylady, onyń ishinde qurylǵyny jeke irikteý, baptaý, qulaq qalyptamasyn daıyndaý, patsıentti paıdalaný tártibine úıretý, sondaı-aq kepildik jáne kepildikten keıingi servıstik qyzmet kórsetý qarastyrylǵan.
Sonymen qatar elimizde, ásirese balalardyń arasynda, estý qabileti buzylystaryn erte anyqtaý júıesi qarqyndy damyp keledi. Aýdıologııalyq skrınıngke tsıfrlyq baqylaý engizilgennen keıin balalardaǵy estý qabileti buzylystary anyqtalǵan jaǵdaılar sany úsh eseden astam artty. Bul dárigerlerge emdeý men ońaltýdy erterek bastaýǵa múmkindik beredi.
Búginde Qazaqstanda mamandandyrylǵan sýrdologııalyq kabınetter jumys isteıdi. Onda dıagnostıka júrgizilip, estý apparattary irikteledi jáne estý-sóıleý ońaltý qyzmetteri kórsetiledi. Estý qabileti aýyr dárejede buzylǵan balalarǵa tegin medıtsınalyq kómektiń kepildik berilgen kólemi men MÁMS júıesi sheńberinde kohlearlyq ımplantattaý jáne súıek ótkizgishtigi ımplantattaryn ornatý sııaqty zamanaýı emdeý ádisteri qoljetimdi.
Densaýlyq saqtaý mınıstrligi medıtsınalyq talaptarǵa sáıkes keletin zamanaýı estý apparattarynyń úlgilerin irikteý boıynsha da daıyndyq jumystaryn júrgizdi. Tizbege estý qabiletiniń tómendeý dárejesine qaraı ártúrli qýat deńgeıindegi qurylǵylar engizildi.
Qazirgi tańda normatıvtik jáne uıymdastyrýshylyq daıyndyq jumystary tolyq aıaqtaldy. Kelesi kezeńde óńirler tarapynan qarjylandyrý bólinip, memlekettik satyp alý rásimderi júrgiziledi.
Jańa júıe myńdaǵan qazaqstandyqtyń múgedektik mártebesine qaramastan qajetti estý ońaltý kómegin ýaqtyly alýyna jáne olardyń ómir sapasyn arttyrýǵa múmkindik beredi.
Aıta keteıik, jaqynda estý qabiletindegi aqaýdy erte anyqtaıtyn elimizdegi alǵashqy ortalyq ashyldy.
