DSM eldegi koronavırýsqa qatysty epıdemıologııalyq jaǵdaıdy baıandady

ASTANA. KAZINFORM — Qazaqstanda koronavırýs ınfektsııasyna baılanysty epıdemıologııalyq jaǵdaı turaqty, dep habarlaıdy DSM baspasóz qyzmeti.

Qazaqstannyń Densaýlyq saqtaý mınıstrligi eldegi syrqattanýshylyq pen álemdegi epıdemıologııalyq jaǵdaıǵa apta saıyn monıtorıng júrgizýdi jalǵastyryp keledi.

— 2025 jyldyń basynan beri jalpy 329 rastalǵan jaǵdaı tirkeldi, qaıtys bolý jaǵdaılary tirkelgen joq. Ótken jyldyń osyndaı kezeńimen salystyrǵanda syrqattanýshylyq 3,7 esege azaıǵan. Respýblıka boıynsha aptasyna 25 jaǵdaıǵa deıin tirkelip jatyr. Infektsııalyq tósekterdiń júktemesi — 27%, reanımatsııalyq tósek-oryndar — 2%, sondaı-aq statsıonarlarda koronavırýs ınfektsııasymen 2 naýqas em qabyldap jatyr, jaǵdaıy — ortasha aýyrlyqta, — delingen vedomstvo habarlamasynda.

Álemdegi jaǵdaı sııaqty, Qazaqstanda da 2022 jyly alǵash anyqtalǵan Omıkron nusqasynyń shtamdary aınalymda júr. 

— Omıkron nusqasy 30-dan astam mýtatsııany qamtıdy jáne aýrýdyń jeńil ótýimen sıpattalady, sondyqtan statsıonarlyq emdeýdi qajet etpeıdi. Aýrýdyń negizgi sımptomdary — joǵarǵy tynys joldarynyń zaqymdanýy, murynnyń bitelýi, tamaqtyń aýyrýy, jótel, — dep túsindirdi mınıstrlik.

Basqa elderde syrqattanýshylyqtyń ósýin eskere otyryp, Densaýlyq saqtaý mınıstrligi kelesilerdi usynady:

• jiti respıratorlyq ınfektsııamen aýyratyn adamdarmen tyǵyz qarym-qatynastan aýlaq bolý;

• qoldy, ásirese naýqas nemese olardyń aınalasyndaǵy adamdarmen tikeleı baılanystan keıin jıi jýý;

• úı-jaılardy turaqty túrde jeldetý;

• aýrý sımptomdary baıqalǵan jaǵdaıda medıtsınalyq kómekke júginý.

Osydan buryn Donald Tramp ákimshiligi Aq úı saıtynda koronavırýs indetiniń shynaıy shyǵý tegine arnalǵan arnaıy veb-paraqsha ashqanyn jazǵanbyz.