DSM eldegi barlyq perınataldyq ortalyqta tekserý júrgizedi
ASTANA. KAZINFORM — Densaýlyq saqtaý mınıstri 15 tamyzǵa deıin elimizdegi bosandyrý qyzmetin kórsetetin barlyq 69 medıtsınalyq uıymda aýqymdy tekserý júrgizýdi tapsyrdy.
Sanıtarııalyq-epıdemıologııalyq baqylaý komıteti ınfektsııalyq baqylaý talaptarynyń saqtalýyn baǵalap, analar men jańa týǵan nárestelerdiń qaýipsizdigin barynsha qamtamasyz etýge jáne aýrýhanaishilik ınfektsııalardyń aldyn alý sharalaryn kúsheıtýge nazar aýdarady.
Tıisti tapsyrmalar Densaýlyq saqtaý mınıstrliginde medıtsınalyq uıymdardaǵy ınfektsııalyq baqylaý júıesin jetildirýge arnalǵan apparattyq keńes barysynda berildi.
Vedomstvonyń málimetinshe, tekserýlerdiń maqsaty — sanktsııalar sanyn arttyrý emes, táýekelderdiń aldyn alý jáne olardy joıý, sondaı-aq bosandyrý qyzmetin kórsetetin uıymdardaǵy medıtsınalyq kómektiń sapasyn arttyrý.
— Infektsııalyq baqylaý júıesiniń basty mindeti — saldarmen kúresý emes, táýekelderdiń aldyn alý. Infektsııanyń árbir jaǵdaıy kásibı turǵydan jan-jaqty taldanyp, patsıentterdiń qaýipsizdigin arttyrýǵa baǵyttalǵan naqty sheshimder qabyldaýǵa negiz bolýǵa tıis. Ashyq ári obektıvti kózqaras qana medıtsınalyq kómektiń sapasyn jetildirýge múmkindik beredi, — dep atap ótti Densaýlyq saqtaý mınıstri Aqmaral Álnazarova.
Keńes qorytyndysy boıynsha mınıstr ınfektsııa jaǵdaılaryn tergep-tekserý tásilderin qaıta qaraýdy, profılaktıkaǵa basymdyq bere otyryp sanıtarııalyq qaǵıdalar men memlekettik baqylaýdyń tekserý paraqtaryn jańartýdy, sondaı-aq ınfektsııanyń árbir jaǵdaıynyń týyndaý sebepterine obektıvti baǵa berýdi tapsyrdy. Bul elimizdegi ınfektsııalyq baqylaý júıesiniń tıimdiligin arttyrýǵa baǵyttalǵan.
Sonymen qatar óńirlik densaýlyq saqtaý basqarmalaryna medıtsınalyq uıymdardy dezınfektsııa jáne zararsyzdandyrý jumystaryn júrgizýge qajetti resýrstarmen, jeke qorǵanysh quraldarymen, zamanaýı jabdyqtarmen jáne bir rettik shyǵys materıaldarymen qamtamasyz etý, sondaı-aq medıtsına qyzmetkerlerin ınfektsııalyq baqylaý máseleleri boıynsha júıeli oqytýdy uıymdastyrý tapsyryldy.
Antıbıotıkterge tózimdilik máselesine de erekshe nazar aýdaryldy. Medıtsınalyq jáne farmatsevtıkalyq baqylaý komıteti bakterııaǵa qarsy preparattardy retseptimen bosatý talaptarynyń saqtalýyna baqylaýdy kúsheıtedi. Sebebi antıbıotıkterdi utymdy paıdalaný mıkroorganızmderdiń emge tózimdiliginiń aldyn alýdyń mańyzdy quramdas bóligi bolyp tabylady.
Tekserý qorytyndylary boıynsha árbir óńirde ınfektsııalyq baqylaý júıesin odan ári jetildirýge arnalǵan jol kartalary bekitiledi.
Eske salaıyq, buǵan deıin densaýlyq saqtaý resýrstaryn basqarýdyń biryńǵaı tsıfrlyq platformasy iske qosylǵanyn habarlaǵan edik.
